सिमेन्टको मूल्य वृद्धिप्रति सांसदहरुको आपत्ति
काठमाडौँ । प्रतिनिधि सभा सदस्यहरुले सिमेन्टको मूल्य वृद्धिलाई नियन्त्रण गर्न सरकारको ध्यानाकर्षण गराएका छन्। आजको बैठकमा सांसदहरुले सभामुखमार्फत सरकारलाई सिमेन्टको अत्यधिक मूल्य वृद्धिका कारण उपभोक्तालाई परेको कठिनाइको बारेमा जानकारी दिएका थिए।
सांसद राजेन्द्रकुमार केसीले नेपाली सिमेन्टको मूल्य बिना कारण बढाइएको भन्दै आपत्ति जनाए। उनले भने, “झन्डै ९८ प्रतिशत स्वदेशी कच्चा पदार्थमा उत्पादन हुने नेपाली सिमेन्टको मूल्य अत्यधिक बढेको छ।” उनले यस सम्बन्धमा उद्योग मन्त्रालयको ध्यानाकर्षण गराए। सांसद योगेन्द्र मण्डलले सिमेन्ट मूल्य कायम गर्न सरकारको निर्णयको कार्यान्वयन नहुनुमा खेद प्रकट गरे। उनले ४८४ रुपैयाँमा रहेको सिमेन्टको मूल्य ७४५ रुपैयाँ पुगेको उल्लेख गर्दै, यसले निर्माण व्यवसायी र आम उपभोक्तालाई घाटा पुर्याएको बताए।
शून्य समयमा सांसदहरुले सडक, पुल निर्माण, उखु किसानलाई अनुदान, स्वास्थ्य बिमा लगायतका विषयमा सरकारको ध्यानाकर्षण गराए। सांसद भानुभक्त जोशीले हमासको कब्जामा रहेका विपिन जोशीको रिहाइका लागि कूटनीतिक पहल गर्ने आग्रह गरे।
सांसद मनिष झाले जनकपुरको एक हजार २०० बिघा जग्गा हिनामिनाको विषयमा अध्ययन गर्ने बताए। सांसद महेश बस्नेतले सरकारी कार्यालयहरुमा अंग्रेजी भाषाको प्रयोगको संवैधानिकता सम्बन्धी सचेत गर्न आग्रह गरे।
सांसदहरुले स्वास्थ्य बिमा, ग्यासको सिलिन्डर निरीक्षण, भ्रष्टाचार नियन्त्रण लगायतका विभिन्न विषयमा सरकारको ध्यानाकर्षण गराए। सांसद रुक्मणी राना बराइलीले बालबालिकाको मुटुरोग उपचारमा परेको असरको बारेमा गम्भीरता व्यक्त गरे।
