शिवरात्रीमा गोजी छाम्ने दुई जना पक्राउ, भेटियो १० थान मोबाइल
काठमाडौँ। महाशिवरात्रीको अवसरमा पशुपति क्षेत्रका दर्शनार्थीहरूको मोबाइल चोरी गर्ने दुई जना व्यक्तिहरूलाई प्रहरीले पक्राउ गरेको छ। गोरखाका ३१ वर्षीय बिजय मगर र ३४ वर्षीय अभिषेक गुरुङलाई १० थान मोबाइलसहित प्रहरीले नियन्त्रणमा लिएको हो।
बालाजु बसन्तनगर गुम्बा नजिकबाट राति महाशिवरात्रीको दिन पक्राउ गरिएको हो। पक्राउ गरिएका व्यक्तिहरूसँग १० थान मोबाइल, नगद चार हजार रुपैयाँ र एक कालो झोला समेत बरामद गरिएको प्रहरीले जनाएको छ ।
प्रहरीका अनुसार यी व्यक्तिहरूले महाशिवरात्रीको अवसरमा पशुपति क्षेत्रका भक्तजनहरूको मोबाइल चोरी गर्ने उद्देश्यले आफ्नो गतिविधि सञ्चालन गरिरहेका थिए। पक्राउ गरिएका व्यक्तिहरूको आपराधिक गतिविधि बारे थप अनुसन्धान भइरहेको छ ।
