रुसबाट तेल किन्ने देशमाथि अमेरिकाले ५००% कर लगाउने चेतावनी, भारतको व्यापार जोखिममा!
काठमाडौँ । अमेरिकामा रुसबाट कच्चा तेल खरिद गर्ने देशहरूमाथि ५०० प्रतिशत भन्सार कर लगाउने प्रस्तावबारे गम्भीर बहस सुरु भएको छ। अमेरिकी सिनेटर तथा रिपब्लिकन नेता लिन्डसे ग्राहमले गत अप्रिलमा अमेरिकी कांग्रेसमा प्रस्तुत गरेको रुस प्रतिबन्ध ऐन २०२५ मार्फत भारत, चीन जस्ता मुलुकहरूलाई निशाना बनाउने तयारी गरिएको छ।
सिनेटर ग्राहमले अमेरिकी समाचार संस्था एबीसी न्यूजसँग कुरा गर्दै भने, ‘कुनै देशले रुसबाट तेल किन्छ, तर युक्रेनलाई सहयोग गर्दैन भने त्यो देशबाट अमेरिका आउने सामानमा ५०० प्रतिशत भन्सार कर लगाइनेछ। भारत र चीनले पुटिनको ७० प्रतिशत तेल किनिरहेका छन् र यसले उनको युद्ध मेसिन चलिरहेको छ।’
उक्त प्रस्तावित ऐनले अमेरिकी राष्ट्रपति जो बाइडेनलाई भारत, चीन र अन्य रुसी तेल खरिदकर्ता मुलुकहरूमा अत्यधिक भन्सार लगाउने अधिकार दिनेछ। ग्राहमका अनुसार हालसम्म ८४ जना अमेरिकी सांसदहरूले यो विधेयकलाई समर्थन गरिसकेका छन्।
यस प्रस्तावले भारतमाथि प्रत्यक्ष प्रभाव पार्ने देखिएको छ। भारत विश्वको तेस्रो ठूलो कच्चा तेल आयातकर्ता र उपभोक्ता हो, जसले दैनिक करिब ५१ लाख ब्यारेल कच्चा तेल विदेशबाट ल्याउँछ। रुस भारतको ठूलो आपूर्तिकर्ता बनेको छ। युद्ध सुरु हुनुअघि भारतको कुल तेल आयातमा रुसको हिस्सा दुई प्रतिशतभन्दा कम थियो, जुन अहिले झण्डै ४० प्रतिशत पुगेको छ।
