बन्दीपुर केवलकारको आईपीओ आजदेखि बिक्रीमा, क–कस्ले कति कित्तासम्म दिन पाइन्छ आवेदन?
काठमाडौं । बन्दीपुर केवलकार एण्ड टुरिजम कम्पनी लिमिटेडले आज साउन ६ गतेदेखि शेयरको प्रारम्भिक निष्कासन (आईपीओ) गरेको छ।
कम्पनीले प्रतिकित्ता १०० रुपैयाँ अंकित मूल्यका दरले जम्मा ५८ लाख ६० हजार कित्ता आईपीओ निष्कासन गर्न असार १९ गते नेपाल धितोपत्र बोर्डबाट अनुमति पाएको हो।
कम्पनीले भोलि पहिलो चरणको आईपीओ बिक्री खुला गर्न लागेको हो जसमा आयोजना प्रभावित स्थानीय बासिन्दा र वैदेशिक रोजगारीमा गएका नेपालीले मात्रै आवेदन दिन सक्नेछन्।
कम्पनीले आयोजना प्रभावितका लागि ५ लाख ६६ हजार कित्ता र वैदेशिक रोजगारीमा रहेका नेपालीका लागि ५ लाख २९ हजार ४०० कित्ता निष्कासन गरेको हो।
आयोजना प्रभावितलाई छुट्याइएको आईपीओमा तनहुँको बन्दीपुर र आँबुखैरेनी गाउँपालिकाका सबै वडा, भानु नगरपालिका वडा नम्बर १ तथा गोरखाको पालुङटार नगरपालिका वडा नम्बर ७ का स्थानीय बासिन्दाले आवेदन दिन सक्नेछन्।
यसमा आवेदन दिंदा कम्तीमा १० कित्ताका लागि दिनु पर्नेछ भने बढीमा २० हजार कित्तासम्म माग गर्न सकिनेछ। जसअनुसार घटीमा १ हजार र बढीमा २० लाख रुपैयाँसम्म लाग्नेछ।
वैदेशिक रोजगारीमा रहेकाले आवेदन दिने अन्तिम मिति साउन ९ गतेसम्म मात्रै रहेको छ तर त्यस अवधिमा पर्याप्त आवेदन नपरेमा भदौ २० गतेसम्म लम्बिनेछ। यता आयोजना प्रभावितले साउन २० गतेसम्म आवेदन दिन सक्नेछन् भने त्यस अवधिभित्र पर्याप्त आवेदन नपरेमा भदौ ४ गतेसम्म लम्बिनेछ।
यस कम्पनीलाई केयर रेटिङ्गस नेपाल लिमिटेडले ‘केयर एनपी डबल बी इस्यूअर रेटिङ’ दिएको छ यसले कम्पनीको दायित्व बहन गर्ने क्षमतामा औषत जोखिम रहेको संकेत गर्छ। कम्पनीको आईपीओ निष्कासन तथा बिक्री प्रबन्धकको काम नेपाल एसबिआई मर्चेण्ट बैंकिङ्ग लिमिटेडले गर्नेछ।
आयोजना प्रभावितले बिक्री प्रबन्धकका साथै कम्पनीको वेबसाइट, बन्दीपुरमा रहेको कम्पनीको कार्यालयको तल्लो स्टेशन, आँबुखैरेनी गाउँपालिका, भानु नगरपालिका वडा नम्बर १ र पालुङटार नगरपालिकाको वडा नम्बर ७ को कार्यालयमा आईपीओ फाराम प्राप्त गर्न सक्नेछन्।
वैदेशिक रोजगारीमा रहेकाले नेपाल धितोपत्र बोर्डको सी–आस्बा सदस्य बैंक तथा वित्तीय संस्था र तिनका तोकिएका शाखा कार्यालयका साथै मेरो शेयर अनलाई एपबाट पनि आवेदन दिन सक्नेछन्।
पहिलो चरणको आईपीओ निष्कासन गरी बाँडफाँड भएपछि दोस्रो चरणमा सर्वसाधारणलाई समेत आईपीओ निष्कासन गरिनेछ।
