याडिया स्कुटर खरिद हुनै छोडेः ग्राहक लोभ्याउन बिक्रेताको छुट रणनीति
काठमाडौँ ।ग्राहक गुमाउँदै गएपछि याडिया ई८एस प्रो स्कुटर भारी छुटमा बेच्दै आएको याडियाको नेपालका लागि आधिकारिक वितरक कुजु नेपाल प्रालिले पुनः अर्का स्कुटरमा भारी छुट योजना ल्याएको छ । पछिल्लो समय नेपाली अटो बजारमा याडियाका स्कुटर बिक्री हुनै छोडेपछि कम्पनी छुट योजना मार्फत ग्राहक लोभ्याउने रणनीति अपनाइरहेको हो ।
पहिले २ लाख ८५ हजार रुपैयाँमा बिक्री हुँदै आएको याडिया भेलक्स अब २ लाख ४५ हजार रुपैयाँमै उपलब्ध हुनेछ । कम्पनीले यसको बिक्री बढाउने उद्देश्यले यस्तो योजना ल्याएको हो । याडिया भेलक्समा ३२०० वाटको इलेक्ट्रिक मोटर छ र १७२ न्युटन मिटर टर्क प्रदान गर्ने क्षमता रहेको दाबी गरिएको छ । स्कुटरको अधिकतम गति प्रतिघण्टा ६२ किलोमिटर रहेको छ भने २.१ किलोवाटको लिथियम आइरन फस्फेट ब्याट्रीले पूर्ण चार्जमा १०० किलोमिटरको यात्रा क्षमता दिन्छ भन्ने कम्पनीको दाबी छ ।
तर, नेपाली बजारमा यस्ता स्कुटरको माग घटेको देखिन्छ। प्रतिस्पर्धात्मक मूल्यमा दर्जनौं अन्य इलेक्ट्रिक स्कुटर उपलब्ध भएका कारण महँगो मूल्यमा बिक्री हुने याडियाका स्कुटर ग्राहकको प्राथमिकतामा पर्दैनन् । याडियाका ग्राहकहरूले पटक–पटक कम रेञ्ज, चार्जको लामो समय र मोटरको अस्थिर प्रदर्शनबारे गुनासो गरेका छन् । यस्ता अनुभवले गर्दा नयाँ ग्राहक आकर्षित गर्न कम्पनीलाई भारी छुटको योजना ल्याउन बाध्य बनाएको छ ।
याडियाका स्कुटरले कम्पनीले दाबी गरेको जति प्रदर्शन र सुविधा दिन सकेको छैन । बजारमा अन्य ब्रान्डले सस्तो मूल्यमा बढी सुविधा र लामो रेञ्ज प्रदान गरिरहेका छन् । यसको परिणामस्वरूप याडियाका स्कुटर हाल नेपाली बजारमा आकर्षण गुमाएका छन् । महँगो मूल्यमा बिक्री हुँदै आएका याडियाका स्कुटरमा ग्राहकले अपेक्षा गरेजस्तो अनुभव नपाएका कारण कम्पनीले ग्राहक लोभ्याउन भारी छुट योजना लागू गरेको हो ।
ग्राहक गुमाउँदै याडिया, भारी छुटमा बेच्न बाध्य भयो ई८एस प्रो स्कुटर
