एनएमबि लघुवित्तको लोभलाग्दो प्रगति, नाफासँगै प्रतिशेयर आम्दानीमा वृद्धि
काठमाडौं । एनएमबि लघुवित्त वित्तीय संस्था लिमिटेडले चालू आर्थिक वर्षको पहिलो त्रैमासिक वित्तीय विवरण आज सार्वजनिक गरेको छ। उक्त वित्तीय विवरण अनुसार गत आवको पहिलो त्रैमासको तुलनामा चालू आवमा लोभलाग्दो प्रगति गरेको हो।
कम्पनीले गत आवको असोज मसान्तसम्म ७१ लाख ५४ हजार रुपैयाँ मात्रै खुद नाफा कमाएकोमा चालू आवको सोही अवधिमा ७७.८७ प्रतिशतको वृद्धि सहित १ करोड २७ लाख २५ हजार रुपैयाँ खुद नाफा कमाउन सफल भएको छ।
त्यसैगरी समीक्षा अवधिमा कम्पनीको खुद ब्याज आम्दानी ८ करोड ८ लाख रुपैयाँबाट ६८.५५ प्रतिशतको वृद्धि सहित १३ करोड ६३ लाख रुपैयाँ पुगेको छ भने कुल सञ्चालन आम्दानी पनि ९ करोड ८ लाख रुपैयाँबाट ६६.४७ प्रतिशतको वृद्धि सहित १५ करोड १२ लाख रुपैयाँ पुगेको छ।
त्यस्तै गत आवको पहिलो त्रैमाससम्म कम्पनीले ७१ लाख ३९ हजार रुपैयाँ मात्रै सञ्चालन नाफा गरेकोमा चालू आवको सोही अवधिमा १५४.६० प्रतिशतको वृद्धि गर्दै १ करोड ८१ लाख ७६ हजार रुपैयाँ सञ्चालन नाफा गरेको छ।
कम्पनीको खराब कर्जा ६.३७ प्रतिशतबाट घटेर ४.६३ प्रतिशतमा झर्दा प्रतिशेयर आम्दानी ३.९७ रुपैयाँबाट बढेर ७.०६ रुपैयाँ कायम भएको छ। कम्पनीको प्रतिशेयर नेटवर्थ १४१.०१ रुपैयाँ रहेको वित्तीय विवरणमा उल्लेख गरिएको छ।
चुक्ता पूँजी ७२ करोड १४ लाख रुपैयाँ रहेको कम्पनीको शेयर प्रिमियम ७ करोड २९ लाख रुपैयाँ रहेको छ। यता रिजर्भ कोषमा २२ करोड ३ लाख रुपैयाँ सञ्चिति छ भने जगेडा कोषमा ४६ लाख रुपैयाँ ऋणात्मक रहेको छ। कम्पनीले ७ अर्ब ३ करोड २५ लाख रुपैयाँ कर्जा लगानी गरी १ अर्ब ५९ करोड ८३ लाख रुपैयाँ निक्षेप संकलन गरेको छ।
