एनएलजी इन्स्योरेन्सको आम्दानी बढ्यो, अन्य वित्तीय सूचक कस्तो ?
काठमाडौं । एनएलजी इन्स्योरेन्स कम्पनी लिमिटेडले चालू आवको पहिलो त्रैमासिक वित्तीय विवरण सार्वजनिक गरेको छ। जस अनुसार गत आवको तीन महीनामा १३ करोड ५१ लाख १९ हजार रुपैयाँ खुद ब्याज आम्दानी गरेको कम्पनीले चालू आवको सोही अवधिमा १७ करोड ५७ लाख ७७ हजार रुपैयाँ खुद ब्याज आम्दानी गरेको छ।
त्यसैगरी समीक्षा अवधिमा कम्पनीको कुल आम्दानीमा समेत वृद्धि भएको तथ्यांकले देखाएको छ। गत आवको असोज मसान्तसम्म ३१ करोड १४ लाख ३६ हजार रुपैयाँ कुल आम्दानी गरेको कम्पनीले चालू आवको असोज मसान्तसम्म ३९ करोड ४० लाख ८८ हजार रुपैयाँ कुल आम्दानी गर्न सफल भएको छ।
आम्दानीसँगै कम्पनीको कुल खर्चमा पनि वृद्धि भएको देखिएको छ। गत आवको तीन महीनामा कम्पनीले २३ करोड ८४ लाख ५५ हजार रुपैयाँ कुल खर्च गरेकोमा चालू आवको तीन महीनामा भने ५२ करोड २७ लाख १० हजार रुपैयाँ खर्च गरेको छ।
खर्चमा वृद्धि आएसँगै कम्पनी घाटामा पुगेको छ। गत आवको तीन महीनामा ४८ करोड ९० लाख ५६ हजार रुपैयाँ खुद नाफा कमाएको यस कम्पनीले चालू आवको तीन महीनामा भने १० करोड १० लाख ५२ हजार रुपैयाँ खुद घाटा बेहोरेको छ। कम्पनी घाटामा पुगेसँगै प्रतिशेयर आम्दानी पनि १२.७१ रुपैयाँबाट घटेर १५.७६ रुपैयाँ ऋणात्मक भएको छ। प्रतिशेयर नेटवर्थ भने १६८.७६ रुपैयाँ रहेको छ।
चुक्ता पूँजी २ अर्ब ५६ करोड ५२ लाख रुपैयाँ रहेको यस कम्पनीको शेयर प्रिमियम २७ करोड १९ लाख १६ हजार रुपैयाँ, स्पेशल रिजर्भमा १ अर्ब ३८ करोड २७ लाख २५ हजार रुपैयाँ, महाविपत्ति कोषमा ८ करोड ५७ लाख ३९ हजार रुपैयाँ सञ्चिति रहेको छ भने जगेडा कोषमा १५ करोड रुपैयाँ ऋणात्मक रहेको छ।
गत वर्षको असोज मसान्तसम्म कम्पनीको जीवन बीमा कोषमा ३ अर्ब ३८ करोड ६५ लाख ९९ हजार रुपैयाँ रहेकोमा चालू आवको असोज मसान्तसम्म बढेर ४ अर्ब ५० करोड ४ लाख ४३ हजार रुपैयाँ कायम भएको छ।
