बीमा प्राधिकरणका पूर्वअध्यक्ष सिलवाललाई सफाइ दिने फैसलाविरुद्ध सर्वोच्च पुग्यो अख्तियार

काठमाडौँ । नेपाल बीमा प्राधिकरणका पूर्वअध्यक्ष सूर्यप्रसाद सिलवाललाई विशेष अदालतले दिएको सफाइ विरुद्ध अख्तियार दुरुपयोग अनुसन्धान आयोगले सर्वोच्च अदालतमा पुनरावेदन दर्ता गरेको छ।

विशेष अदालतको फैसला अन्यायपूर्ण रहेको ठहर गर्दै अख्तियारले मंसिर १७ गते सर्वोच्चमा पुनरावेदन दर्ता गरेको प्रवक्ता राजेन्द्रकुमार पौडेलले जानकारी दिए।

सिलवालले जन्ममिति परिवर्तन गरी पद बहाल रहन मन्त्रीपरिषद् तथा सम्बन्धित निकायमा ‘झुट्टा विवरण’ पेस गरेको आरोपमा अख्तियारले उनीविरुद्ध विशेष अदालतमा भ्रष्टाचार मुद्दा दायर गरेको थियो। अख्तियारका अनुसार सिलवालले आफ्नो वास्तविक जन्ममिति २०१५।०४।१५ रहे पनि २०१६।०७।२२ भएको नागरिकता पेस गरी बीमा प्राधिकरणको अध्यक्षमा निरन्तर बसाइ कायम गरेका थिए। साथै, राहदानी विभागमा समेत तीन वर्ष उमेर घटाई कूटनीतिक तथा विशेष राहदानी हासिल गरिएको, त्यसबाट लाभ–सुविधा लिएको जिकिर गरिएको छ।

अख्तियारले दायर गरेको आरोपपत्रमा भ्रष्टाचार निवारण ऐनका दफा १५ र १६ (१) अनुसार सजाय माग गरिएको थियो। त्यससँगै २०८० साउन १५ देखि हालसम्म लिएको ३६ लाख ६२ हजार १५४ रुपैयाँ १६ पैसा बराबरको लाभ–सुविधा असुल–जफत गर्नुपर्ने मागसमेत गरिएको थियो। यद्यपि विशेष अदालतले २०८१ पुस २ गते सुनाएको फैसलामा सिलवाललाई सफाइ दिएको थियो।

उक्त फैसलाले चित्त नबुझेपछि आयोगले सर्वोच्च अदालतमा पुनरावेदन गरेको अख्तियार प्रवक्ता पौडेलले बताए।