डिशहोमले ल्यायो ‘खुशी’ एआई, यस्ता छन् विशेषता

काठमाडौं । डिश मिडिया नेटवर्क लिमिटेड (डिशहोम) ले निरन्तर नयाँ प्रविधिको प्रयोग गर्दै नेपालमै दुईतर्फी भोइस एआई ‘खुशी’ सार्वजनिक गरेको छ। ग्राहकलाई डिजिटल प्रविधिसँग अझ नजिक ल्याउने उद्देश्यले डिशहोमले केही समय अघि भर्चुअल प्रिभिलेज कार्ड सार्वजनिक गरेको थियो। सो कार्ड मार्फत् डिशहोमका ग्राहकले होटल, रेस्टुरेन्ट, रिसोर्ट, स्वास्थ्य सेवा, इलेक्ट्रोनिक सामान लगायत २०० भन्दा बढी साझेदार व्यवसायमा २५ प्रतिशतसम्म छुट पाउने सुविधा प्राप्त गर्दै आएका छन्।

त्यसपछि डिशहोमले नेपाल प्रिमियर लिग २०२५ लाई आफ्नै ‘डिशहोम गो’ नामक ओटीटी प्लेटफर्ममार्फत प्रत्यक्ष प्रसारण गरी उद्घाटन खेलमा दुई लाखभन्दा बढी दर्शकलाई एकै पटक खेल देखाउन सफल भएको थियो। एनपीएल खेलको प्रत्यक्ष प्रसारण हालसम्म पनि डिशहोम गो ले गरिरहेकै छ। यही निरन्तर नवप्रवर्तनको यात्रालाई थप उचाइमा पुर्याउने उद्देश्यले डिश होम–एआई ‘खुशी’ सार्वजनिक गरिएको जनाएको छ। यसलाई भोइस–एआई प्रविधिमा डिशहोमको ठूलो कदमको रूपमा हेरिएको छ।

डिशहोमले स्थानीय सन्दर्भ र उपयोगितालाई आधार मानेर एआई सेवा विकास तथा विस्तार गर्ने स्पष्ट रणनीति अपनाएको छ र यही उद्देश्यका लागि डिशहोमले आफ्नो रणनितिका साझेदारसँग सहकार्य गरेको छ। डिशहोमका लागि एआईको प्रयोगक्षेत्रमा विशेष रूपमा सेवा निष्क्रिय भएका ग्राहकलाई नेपाली भाषामा मानव–जस्तै आवाजमा निरन्तर संवादमार्फत पुनःनवीकरणका लागि सम्पर्क गर्ने, सम्बन्धित अफरहरू प्रस्तुत गर्ने तथा कुराकानीको क्रममा प्राप्त हुने प्रतिक्रिया, गुनासो र सुझाव सङ्कलन गरी ग्राहक सेवा केन्द्र समुह सम्म पुर्‍याउने समावेश हुनेछ।

कुराकानीकै क्रममा ग्राहकको भावनात्मक प्रतिक्रिया विश्लेषण गरी प्रतिवेदन तयारी गर्ने क्षमता समेत एआईमा उपलब्ध हुनेछ। समय–समयमा नेटवर्कमा प्राविधिक समस्याले गर्दा सेवा अवरुद्ध हुने अवस्थामा एआई प्रणाली डिशहोमको केन्द्रीय प्रणालीसँग एकीकृत भई ग्राहकले ग्राहक सेवा केन्द्रमा कल गर्दा अवरोधको कारण, अनुमानित समाधान समय, तथा प्रगति विवरण प्रदान गर्न सक्षम हुनेछ। आगामी चरणमा डिशहोमले ‘खुशी’ लाई ग्राहक पहिचान विवरण प्रमाणीकरण गर्ने, सही विवरण सङ्कलन गरी स्वचालित रूपमा ग्राहक डेटाबेसमा अद्यावधिक गर्ने सुविधा शुरु गर्नेछ। जडान तथा प्राविधिक मर्मतसम्बन्धी समय व्यवस्थापनमा पनि यो एआईको प्रयोग गरिने डिशहोमले जनाएको छ।

यो एआईले ग्राहकसँग सम्पर्क गरी उपयुक्त समय माग्ने, व्यस्ततालाई ध्यानमा राख्दै समय पुनःसमायोजन गर्ने तथा सेवा गुणस्तरलाई सधैं समान र समयबद्ध बनाइ राख्ने डिशहोमले उल्लेख गरेको छ। साथै मेसेंजर र वेबच्याटमार्फत प्रदान हुँदै आएको सामान्य जानकारीका लागि प्रयोग हुने च्याटबोटमा समेत यो एआईलाई समावेश गरिने र आगामी चरणमा व्हाट्सएप र भाइबरमा विस्तार गरिने योजना रहेको बताएको छ।

एआई ‘खुशी’ को प्रभावकारी उपयोग नेपाली भाषामा आधारित संवादात्मक एआई प्रणालीको स्तर, दायरा र सुधारमा निर्भर छ भन्ने कुरालाई आत्मसाथ गरी एआई प्रविधिको प्रगति र व्यवसायिक प्रयोगलाई सुदृढ बनाउन डिशहोमले अन्तर्राष्ट्रिय एआई अनुसन्धान तथा विकास संस्थासँग सहकार्य गर्दै नेपाली भाषाको संवाद क्षमता अभिवृद्धिका लागि दीर्घकालीन परियोजनामा सहाकार्यका लागी तयारी गर्दैछ।

डिशहोमले विगतदेखि वर्तमानसम्म सञ्चालित आफ्नो विशाल डेटाबेसलाई परिक्षणको क्रममा अनुसन्धान तथा प्रशिक्षणका लागि उपलब्ध गराउन सकिने डिशहोमका प्रवक्ताले बताएका छन्। डिशहोमले नेपालमा एआई प्रविधिको व्यावसायिक उपयोगमा नयाँ मापदण्ड स्थापित गर्ने र ‘खुशी’ को आगमनसँगै ग्राहक सेवामा अधिक डिजिटल, छरितो, मानवीय–शैलीअनुकूल एआईमा आधारित प्रविधिको विकाशको दिशामा दृढतापूर्वक अघि बढेको जनाएको छ।