उच्च पहाडी र हिमाली भागमा मध्यम वर्षा र हिमपातको सम्भावना
काठमाडौं । हाल पश्चिमी न्यूनचापीय प्रणालीको आंशिक प्रभाव रहेको कारण उच्च पहाडी र हिमाली भागमा मध्यम वर्षा र हिमपातको सम्भावना रहेको जल तथा मौसम पूर्वानुमान महाशाखाले जनाएको छ।
आज दिउँसो देशका उच्च पहाडी तथा हिमाली भागमा पूर्णतया बादल लाग्ने र बाँकी भेगका पहाडी तथा तराईमा बादल लाग्नेछ। साथै उच्च पहाडी तथा हिमाली भागका केही स्थानमा मध्यम हिमपात र वर्षाको सम्भावना रहेको महाशाखाले जनाएको छ।
गण्डकी, लुम्बिनी, कर्णाली र सुदूरपश्चिमका प्रदेशका केही स्थानमा मध्यम वर्षा तथा बागमती, मधेश र कोशी प्रदेशका पहाडी भागका केही स्थानमा र कोशी प्रदेशको तराईका एकदुई स्थानमा हल्का वर्षाको सम्भावना रहेको छ।
आज राति देशका पहाडी र हिमाली भागमा आंशिक बादल लाग्ने र बाँकी भागको मौसम सफा रहनेछ। कोशी, बागमती र गण्डकी प्रदेशका उच्च पहाडी तथा हिमाली भागका एकदुई स्थानमा हल्का हिमपात र वर्षाको सम्भावना रहेकाले सतर्कता अपनाउन महाशाखाले अनुरोध गरेको छ।
