बजारमा तहल्का मच्चाइरहेको आँखुखोला जलविद्युतको नाफामा उछाल, कस्तो छन् अन्य सूचक ?
काठमाडौं । आँखुखोला जलविद्युत कम्पनीले चालु आर्थिक वर्षको दोस्रो त्रैमाससम्मको अवधिमा ४ करोड ६२ लाख रुपैयाँ नाफा आर्जन गरेको छ । जुन अघिल्लो वर्षको सोही अवधिसँग तुलना गर्दा १४७.९३ प्रतिशतले बढी हो । अघिल्लो आवको सोही अवधिसम्म भने कम्पनीले १ करोड ८६ लाख रुपैयाँबराबरको खुद नाफा कमाएको थियो ।
कम्पनीका अनुसार, विद्युत बिक्री आम्दानी पनि वृद्धि भएको छ। यस अवधिमा १३ करोड ४४ लाख रुपैयाँको विद्युत बिक्री भएको छ । जुन अघिल्लो वर्षको तुलनामा ४५.९७ प्रतिशतले बढी हो । अघिल्लो आवको दोस्रो त्रैमाससम्म कम्पनीले विद्युत बिक्रीबाट ९ करोड २१ लाख आर्जन गरेको थियो ।
कम्पनीको वित्त आम्दानी २८ लाख ८२ हजारबाट बढेर ८९ लाख ४७ हजार रुपैयाँ पुगेको छ भने वित्तीय खर्च ४.६८ करोडबाट घटेर ३.२२ करोडमा सीमित भएको छ। कम्पनीको प्रशासनिक तथा साधारण खर्च ७७ लाख ३८ हजारबाट घटेर ३५ लाख ३६ हजारमा सीमित बनेको छ । यद्यपी कम्पनीको साधारण तथा वितरण खर्च भने १ करोड ८१ लाखबाट बढेर २ करोड १४ लाख पुगेको छ ।
कम्पनीको कुल चालु सम्पत्ति ७१ करोड ६३ लाख र कुल चालु दायित्व १२ करोड ४० लाख रुपैयाँ रहेको छ । समीक्षा अवधिसम्म कम्पनीको प्रतिशेयर आम्दानी (ईपीएस)४.६३ रुपैयाँ, प्रतिशेयर नेटवर्थ ९३ रुपैयाँ, मूल्य आम्दानी अनुपात ४४ गुणा र तरलता अनुपात ५.७८ प्रतिशत कायम भएको छ ।
