बजार प्रभुत्व कायम गर्दै अम्बे सिमेन्ट, १० ब्रान्ड बेच्दै वर्षदिनमा १ अर्ब २८ करोडको व्यापार
काठमाडौँ । स्वदेशी सिमेन्ट उद्योगमा पछिल्ला वर्षमा चुनौतीपूर्ण अवस्था देखिएको बेला अम्बे सिमेन्टले वित्तीय र व्यावसायिक सुधारको उत्कृष्ट उदाहरण प्रस्तुत गरेको छ। कम्पनीले सन् २०२५ मा १ अर्ब २८ करोड ९० लाख रुपैयाँको व्यापार गर्ने सफलता हासिल गरेको हो ।
कम्पनीले गरेको व्यापार सन् २०२४ को तुलनामा ७२६ प्रतिशत अर्थात् १ अर्ब १३ करोड ३० लाख रुपैयाँले बढी हो । सो वर्ष कम्पनीले १५ करोड ६० लाख रुपैयाँको मात्रै व्यापार गरेको थियो ।
सन् २००४ मा पर्सा जिल्लामा स्थापना भएको अम्बे सिमेन्टले सुरुमा क्लिङ्कर ग्राइन्डिङ उद्योग सञ्चालन गर्ने उद्देश्य राखेर उत्पादनमा पाइला राखेको थियो। स्थापना कालदेखि नै कम्पनीले दैनिक एक हजार मेट्रिक टन क्षमताको ग्राइन्डिङ युनिट सञ्चालन गर्दै आएको छ। कम्पनीको उद्देश्य स्वदेशी सिमेन्ट बजारमा आफ्नो पहिचान विस्तार गर्नु हो र यस दिशामा अम्बेले निरन्तर प्रगतिशील कदम चाल्दै आएको छ।
उत्पादन क्षेत्रमा कम्पनीले पोर्टल्यान्ड पोजोलाना सिमेन्ट (पीपीसी), अर्डिनरी पोर्टल्यान्ड सिमेन्ट (ओपीसी) र पोर्टल्यान्ड स्ल्याग सिमेन्ट (पीएससी) उत्पादन गर्दै आएको छ। यी उत्पादनहरूलाई कम्पनीले दश विभिन्न ब्रान्डमार्फत बजारमा उपलब्ध गराउँदै आएको छ। पोर्टल्यान्ड पोजोलाना सिमेन्ट दुईवटा ब्रान्डमा, साधारण पोर्टल्यान्ड सिमेन्ट दुईवटा ब्रान्डमा, र पोर्टल्यान्ड स्ल्याग सिमेन्ट छ वटा ब्रान्डमा उत्पादन भइरहेको छ। यी उत्पादनहरू आवासीय, व्यावसायिक तथा औद्योगिक परियोजनाहरूका साथै बाँध, सडक, पुल र अन्य ठूला कंक्रिट संरचनामा प्रयोग भइरहेको छ।
वित्तीय पक्षमा पनि कम्पनीले उल्लेखनीय सुधार देखाएको छ। सन् २०२३ मा सञ्चालन नाफा (ब्याज, कर, मूल्यह्रास तथा परिशोधनपूर्व नाफा) मार्जिन मात्र ०.२७ प्रतिशत थियो। सन् २०२४ मा कम्पनीको सञ्चालन नाफा नकारात्मक अवस्थामा पुगेको थियो। तर, सन् २०२५ मा कम्पनीले सुदृढ पुनरागमन गर्दै ५.५१ प्रतिशत सञ्चालन नाफा मार्जिन कायम गर्न सफल भएको छ।
कम्पनीको उत्पादन क्षमता र विभिन्न ब्रान्डमार्फतको बजार उपस्थिति विकाससँगै पूर्वी नेपालको बजारमा कम्पनीको पहुँच उल्लेखनीय रहेको छ। कम्पनी हाल नेपालको सात प्रदेशमध्ये चार प्रदेशमा र ७७ जिल्लामध्ये ३८ जिल्लामा आफ्नो बजार उपस्थितिको विस्तार गर्न सफल भएको छ। यस क्षेत्रमा प्रमुख ग्राहकहरू आवासीय र व्यावसायिक निर्माण परियोजना, औद्योगिक संरचना र सार्वजनिक पूर्वाधार विकाससँग जोडिएका छन्।
सिमेन्ट उद्योगमा माग वृद्धिको प्रमुख कारण नेपालको पूर्वाधार विकास, आवास निर्माण, औद्योगिक संरचनाको विस्तार र ठूला सार्वजनिक परियोजनाहरू रहेका छन्। यी परियोजनाहरूले गुणस्तरीय सिमेन्टको माग बढाउँदै आएको छ। अम्बे सिमेन्टले यस मागलाई लक्षित गर्दै उत्पादनको गुणस्तर, ब्रान्ड विविधता र वितरक नेटवर्कमा सुधार गर्दै आएको छ।सिमेन्टको गुणस्तरीयता र ब्रान्डको विश्वास निर्माण क्षेत्रमा अम्बे सिमेन्टले उल्लेखनीय भूमिका खेल्दै आएको छ।
अम्बे सिमेन्टको छोटो अवधिका बैंक सुविधा मूल्याङ्कन पुन: पुष्टि गरिएको छ। केयर रेटिङ्स नेपाल लिमिटेडले कम्पनीको ६५ करोड ७५ लाख ९० हजार रुपैयाँ बराबरको छोटो अवधिका बैंक सुविधालाई ए चार मूल्याङ्कन पुनः पुष्टि गरेको जनाएको छ।
कम्पनीको अध्यक्षमा शोभाकर न्यौपाने रहेका छन् ।
