भारतको लोकप्रिय ‘एम्पीयर’ ईभी स्कुटर नेपालमा, मूल्य तीन लाखदेखि सुरु
काठमाडौँ । भारतमा उत्पादन हुने विद्युतीय दुईपांग्रे सवारी (स्कूटर) ब्रान्ड एम्पीयर अब नेपाली बजारमा प्रवेश गरेको छ। एसटीसी अटो सोलुसन प्रा. लि. ले एसटीसी ग्रुप अन्तर्गत भारतको विद्युतीय सवारी निर्माता ग्रीभ्स इलेक्ट्रीक मोबिलिटीले उत्पादन गरेको एम्पीयर ब्रान्डका स्कुटर नेपालमा आधिकारिक रूपमा बिक्री सुरु गरेको जानकारी दिएको छ। कम्पनीले प्रारम्भिक चरणमा ‘नेक्सस’ र ‘म्याग्नस निओ’ मोडलका दुई विद्युतीय स्कुटरमार्फत नेपाली बजारमा प्रवेश गरेको जनाएको छ।
भारतमा विगत एक दशकदेखि विद्युतीय दुईपांग्रे सवारी उत्पादन गर्दै आएको एम्पीयर कम्पनीका उत्पादनहरू त्यहाँ लोकप्रिय ब्रान्डमध्ये एक मानिन्छन्। एसटीसी अटो सोलुसनका अनुसार नेपाली बजारमा ल्याइएका स्कुटरहरू उच्च प्रदर्शनयुक्त र आधुनिक प्रविधिसहित छन्।
यी स्कुटरमा लिथियम आयरन फोस्फेट (एलएफपी) ब्याट्री प्रयोग गरिएको छ, जसको लाइफ साइकल करिब दुई हजार चार्जसम्म रहने बताइएको छ। कम्पनीले ब्याट्रीमा पाँच वर्ष वा ७५ हजार किलोमिटरसम्मको वारेन्टी उपलब्ध गराउने दाबी गरेको छ। अत्यधिक चिसो र तातो तापक्रममा परीक्षण गरिएको ब्याट्री प्रयोग भएकाले स्कुटर नेपाली भौगोलिक अवस्थाका लागि उपयुक्त हुने विश्वास कम्पनीको रहेको छ।
म्याग्नस निओ मोडलमा करिब २.३ किलोवाट क्षमताको ब्याट्री र शक्तिशाली मोटर उपलब्ध छ। कम्पनीका अनुसार एकपटक फुल चार्ज गर्दा करिब १०० किलोमिटरसम्म यात्रा गर्न सकिन्छ। यसमा आरामदायी सिट, १५० किलोग्रामसम्म भार बोक्ने क्षमता र पर्याप्त ग्राउन्ड क्लियरेन्स रहेको छ। यसको मूल्य करिब तीन लाख रुपैयाँ तोकिएको छ।
नेक्सस मोडलमा उच्च क्षमताको मोटर, पाँच राइडिङ मोड, रिभर्स सुविधा, एलईडी लाइट, यूएसबी चार्जर र कनेक्टिभिटी सुविधा उपलब्ध छन्। यस मोडलको मूल्य करिब तीन लाख ३५ हजार रुपैयाँ निर्धारण गरिएको कम्पनीले जनाएको छ।
नेपालमा विद्युतीय सवारीको माग बढ्दै गएको सन्दर्भमा एम्पीयर ब्रान्डको प्रवेशले प्रतिस्पर्धा बढाउने र उपभोक्तालाई थप विकल्प उपलब्ध गराउने अपेक्षा गरिएको छ।
