निर्वाचनका लागि काठमाडौं छाड्नेहरूको संख्या ८ लाख नाघ्यो
काठमाडौं । आगामी निर्वाचनका लागि काठमाडौं उपत्यकाबाट बाहिरिने यात्रुहरूको संख्या उल्लेख्य वृद्धि भएको छ । काठमाडौं उपत्यका प्रहरी कार्यालयका अनुसार मतदान गर्न र घर फर्किन हालसम्म करिब ८ लाख मानिसले उपत्यका छाडिसकेका छन् ।
निर्वाचनको सुरक्षा र व्यवस्थापनका लागि आज राति १२ बजेदेखि उपत्यकाका सडकमा सवारी साधन सञ्चालनमा रोक लगाइने भएको छ । निर्वाचन आयोगले जारी गरेको मापदण्ड अनुसार अत्यावश्यक सेवाका सवारी साधनहरू मात्र चल्न पाउनेछन् भने अन्य निजी र सार्वजनिक सवारी साधन पूर्ण रूपमा बन्द रहनेछन् ।
उपत्यकामा ट्राफिक व्यवस्थापन चुस्त राख्न र सम्भावित दुर्घटना न्यूनीकरण गर्न ट्राफिक प्रहरी सडकमा बाक्लो रूपमा परिचालन गरिएको छ । प्रहरीका अनुसार हालसम्म उपत्यकाको चुनावी माहोल शान्तिपूर्ण रहेको र सुरक्षा कडा पारिएको छ । निर्वाचनको शान्ति सुरक्षाको व्यवस्थापन जिल्ला प्रशासन र सुरक्षा निकायको समन्वयमा भइरहेको र ट्राफिकको अवस्था पूर्ण रूपमा दुरुस्त रहेको प्रहरीले जनाएको छ ।
सवारी साधनको आवतजावतमा रोक लागेकाले सर्वसाधारणलाई निर्वाचन आयोगको नियम पालना गर्न र आवश्यक परेमा मात्र अनुमति प्राप्त सवारी साधन प्रयोग गर्न प्रहरीले आग्रह गरेको छ ।
