जीवन बीमा पोलिसी एक महिनाभित्र रद्द गर्न पाइने, सम्पूर्ण बीमा शुल्क फिर्ता हुने

काठमाडौं । बीमा समितिले हिजो जारी गरेको जीवन बीमा पोलिसी सम्बन्धी नयाँ निर्देशिकामा जीवन बीमा गरेको एक महिनासम्ममा बीमा पोलिसी रद्द गर्न सकिने व्यवस्था थप गरेको छ । सो व्यवस्था अनुसार जीवन बीमा कम्पनीहरुले बीमितले बुझाएको सम्पूर्ण रकम फिर्ता गर्नुपर्ने व्यवस्था छ ।

जीवन बीमा पोलिसी निर्देशिका २०७८ को बुँदा नं २१ मा बीमालेख रद्द गर्न सक्ने व्यवस्था गरेको हो । अन्तर्राष्ट्रिय अभ्यास अनुसार पनि जीवन बीमा पोलिसी एक महिनाभित्र रद्द गर्न सक्ने व्यवस्था छ । नयाँ व्यवस्था अनुसार झुक्याएर, जालसाँजीमा पारेर बीमा पोलिसी काटेको खण्डमा रद्द गर्न बाटो खोलेको छ ।

बीमितले बीमा गरेको एक महिनाभित्रमा उक्त बीमा पोलिसीप्रति चित्त नबुझेमा वा उक्त पोलिसी लिन अनुच्छुक भएमा बीमा पोलिसी काटेको एक ३० दिनभित्रमा बीमा पोलिसी फिर्ता गर्नुपर्ने व्यवस्था गरिएको छ ।

जीवन बीमा निर्देशिका अनुसार त्यसरी एक महिनाभित्रमा बीमा पोलिसी रद्द गर्दा बीमकले जोखिम धारण गरेको जोखिम अवधीको समानुपातिक बीमा शुल्क (सारै न्यून हुन्छ) र अण्डरराइटिङ, खर्च र टिकट बापतको रकम (१० रुपैयाँ) कट्टा गरेर बाँकी रहेको सम्पूर्ण रकम फिर्ता गर्नुपर्ने व्यवस्था गरिएको छ । नयाँ व्यवस्था अनुसार एक महिनाभित्र बीमा पोलिसी रद्द भएमा ९५ प्रतिशतभन्दा बढि रकम फिर्ता हुनेछ ।