काठमाडौंमा आतंकवादविरुद्ध उच्चस्तरीय सेमिनार: दक्षिण एसियाली सुरक्षा चुनौतीमा नेपाल केन्द्रबिन्दु

काठमाडौं । नेपाल इन्स्टिच्युट फर इन्टरनेशनल कोअपरेसन एन्ड इन्गेजमेन्टले २५ असारमा काठमाडौंमा ‘दक्षिण एशियामा आतंकवादः क्षेत्रीय शान्ति र सुरक्षाप्रतिको चुनौती’ विषयक एक उच्चस्तरीय सेमिनार सम्पन्न गरेको छ । उक्त सेमिनारमा सुरक्षा र क्षेत्रीय शान्तिका समसामयिक चुनौतीबारे गम्भीर छलफल भएको थियो।

राष्ट्रपति कार्यालयका सल्लाहकार तथा पूर्व उद्योगमन्त्री सुनील बहादुर थापाले लश्कर ए तैयबाको अल कायदासँगको सम्बन्ध रहेको उल्लेख गर्दै नेपाललाई ट्रान्जिटको रूपमा प्रयोग गर्दै आएको र यसले क्षेत्रीय सुरक्षामा गम्भीर खतरा उत्पन्न गरेको बताए । उनले यस्ता जटिल समस्याहरूलाई समाधान गर्न समन्वित सुरक्षा संयन्त्र र आतंकवादको अतिरेक निराकरण कार्यक्रमहरू आवश्यक रहेकोमा जोड दिए।

सेमिनारमा सहभागी पूर्व रक्षा मन्त्री डा. मिनेन्द्र रिजालले भारतमा भएका आतंकवादी आक्रमणहरूले नेपालमा समेत असर पार्ने सम्भावना रहेको बताए । उनले पाकिस्तानले आतंकवादलाई प्रोत्साहन गरेकोले सार्क क्षेत्रलाई निष्क्रिय बनाएको र क्षेत्रीय आर्थिक एकीकरणमा बाधा पुगेको समेत उल्लेख गरे। डा. रिजालले सेप्टेम्बर ११ को घटनापछि अमेरिकाले देखाएको जस्तो वैश्विक एकता आजको आतंकवादविरुद्धको लडाइँमा पनि अपरिहार्य रहेको औँल्याए।

संघीय सांसद तथा महिला, बालबालिका तथा जेष्ठ नागरिक मन्त्रालयकी पूर्वमन्त्री चन्दा चौधरीले अन्तरदेशीय आतंकवाद नियन्त्रण गर्न हवाला र अवैध वित्तीय कारोबार नियन्त्रण गर्नु आवश्यक रहेको बताइन्।

पूर्व मन्त्री शिशिर खनालले भारतको तत्काल र कडा जवाफ, विशेषतः अपरेसन सिन्दूरु अन्तर्गतको सैन्य कारबाही तथा पाकिस्तान विरुद्धको कूटनीतिक निष्कासनहरु लाई क्षेत्रीय आतंकवाद नियन्त्रणमा नयाँ मापदण्डको स्थापना भएको रूपमा प्रशंसा गरे ।

पूर्व परराष्ट्र मन्त्री तथा सिंचाइ मन्त्री एनपी साउदले नेपाल र क्षेत्रीय शक्तिहरूले आतंकवाद नियन्त्रणका लागि स्पष्ट संयन्त्र विकास गर्नुपर्ने बताएका थिए । उनले आतंकवाद सबैका लागि खतरनाक भएकोले यस विरुद्ध सबै एकजुट हुनु पर्ने उल्लेख गरे ।

नेपाली सेनाका पूर्व मेजर जनरल डा. पूर्ण सिलवालले आतंकवाद नियन्त्रणमा दोहोरो मापदण्ड अपनाउनु हुँदैन, यदि यसलाई पूर्णरूपमा अन्त्य गर्न हो भने भन्ने धारणा राखे ।

नेपाल इन्स्टिच्युट फर इन्टरनेशनल कोअपरेसन एन्ड इन्गेजमेन्टकी निर्देशक सुमित्रा कार्कीले हर्कत-उल-मुजाहिदीनद्वारा काठमाडौंबाट अपहरण गरिएको इण्डियन एयरलाइन्स फ्लाइट IC-814 र पाकिस्तानस्थित लश्कर-ए-तैयबाद्वारा अप्रिलमा पाहलगाममा गराइएको आतंकवादी आक्रमण (जसमा २६ जना नागरिक मारिए, जसमा एक नेपाली पनि थिए) को उदाहरण दिँदै नेपाल आतंकवादप्रति संवेदनशील रहेको उल्लेख गरिन् ।

नेपाल इन्स्टिच्युट फर इन्टरनेशनल कोअपरेसन एन्ड इन्गेजमेन्टका अनुसन्धान निर्देशक डा. प्रमोद जैसवालले पाकिस्तान दक्षिण एशियाको आतंकवादको केन्द्रबिन्दु भएको र उसले आतंकवादीहरूलाई हुर्काउने र संरक्षण गर्ने इतिहास रहेको बताए । उनले पाकिस्तानका रक्षा मन्त्री ख्वाजा मुहम्मद आसिफ द्वारा हालै दिइएको अभिव्यक्ति उद्धृत गर्दै, पाकिस्तानले अमेरिका, बेलायत र पश्चिमी मुलुकहरूका लागि झण्डै तीन दशकसम्म आतंकवादीहरूलाई सहयोग, वित्तीय सहायता र तालिम दिएको कुरा सार्वजनिक रूपमै स्वीकारेको उल्लेख गरे ।

यस सेमिनारमा वरिष्ठ राजनीतिक नेता, पूर्व मन्त्री, सुरक्षा विज्ञ, शैक्षिक र अनुसन्धाता व्यक्तित्वहरु सहभागी थिए । कार्यक्रममा कूटनीतिक समुदाय, नागरिक समाज, नीति निर्माता, सुरक्षाकर्मी, पत्रकार र शैक्षिक क्षेत्रका १५० भन्दा बढी प्रतिनिधिहरूको सहभागिता रहेको थियो ।