बिराटनगरमा नक्कली भ्याट बिलकाे व्यापक काण्ड, एउटै व्यापारीले ८६ कराेड छली
काठमाडौँ । विराटनगरका एक हार्डवेयर व्यवसायीलाई ८६ करोड रुपैयाँभन्दा बढी मूल्य अभिवृद्धि कर (भ्याट) छली गरेको अभियोगमा पक्राउ गरी अनुसन्धान अगाडि बढाइएको छ । यो प्रकरणले स्थानीय व्यापार क्षेत्रमा तहल्का मच्चाएको छ भने अनुसन्धान विस्तार हुँदै धेरै व्यवसायी र फर्म संलग्न हुन सक्ने संकेतहरू आएका छन्।
आन्तरिक राजस्व विभाग र विराटनगर कार्यालयले असार १६ गते ‘न्यू सौरभ ट्रेडिङ’ र ‘बियानी एण्ड ब्रदर्स हार्डवेयर एण्ड मार्बल’ का सञ्चालक सौरभकुमार बियानीलाई पक्राउ गरेपछि यो मुद्दा सार्वजनिक भएको हो। अनुसन्धानका अनुसार बियानीले आफ्नो व्यवसायलाई आवरण बनाएर वास्तविक कारोबार नभएको अवस्थामा करोडौँको नक्कली भ्याट बिल बनाएर छली गरेको खुल्न आएको छ।
बियानीले विभिन्न फर्महरूलाई वस्तु खरिद नगरी नक्कली बिल बिक्री गरी कर छली गरेको देखिएको छ। उनीहरूले प्राप्त गरेको बिल प्रयोग गरेर आफ्ना लागत र नाफा नियन्त्रित गर्ने तथा आयकर र भ्याट दायित्व घटाउने रणनीति अपनाएका थिए। अनुसन्धानबाट थाहा भएको छ कि बियानीले ८६ करोडभन्दा बढीको नक्कली बिल बेचेर कर तिर्नुपर्ने रकम कम गराएका थिए भने २२ करोडभन्दा बढी भ्याट क्रेडिट दाबी गरेर राजस्वमा ठूलो क्षति पुर्याएका छन्।
बियानीले नक्कली बिल बिक्री गर्दा २ देखि ३ प्रतिशतसम्म कमिसन लिने गरेको र सोही नक्कली कारोबारको आधारमा बैंक तथा वित्तीय संस्थाबाट ठूलो ऋण समेत लिएको आशंका अनुसन्धानकर्ताहरूले गरेका छन्।
यो प्रकरणमा थुनामा राखिएको बियानीसँग सम्बन्धित सबै कारोबार र फर्महरूलाई नियमन र प्रमाणित गर्ने ‘क्रस भेरिफिकेसन’ को प्रक्रिया अघि बढाइएको छ। जसमा बैंक भुक्तानी विवरण, मालसामान ढुवानीका कागजात र गोदाम स्टक रेकर्डको प्रमाण खोजिने छ। प्रमाण प्रस्तुत गर्न नसकेका फर्महरूलाई पनि कानूनी कारबाही हुनसक्ने जानकारहरू बताउँछन्।
यो घटनाले विराटनगरको व्यापार क्षेत्रमा ठूलो प्रभाव पारेको छ भने यसले कर प्रणाली सुधार र कडाइ गर्न आवश्यकतालाई झन् बलियो बनाएको छ।
