३२६ म्यानपावर कम्पनीको इजाजतपत्र निलम्बन
काठमाडौं । वैदेशिक रोजगारीका लागि कामदार आपूर्ति गर्न नसकेका ३२६ म्यानपावर कम्पनीहरूलाई वैदेशिक रोजगार विभागले निष्क्रिय मानेर इजाजतपत्र निलम्बन गरेको छ । विभागले आर्थिक वर्ष २०८१/८२ मा आवश्यक न्यूनतम संख्यामा कामदार विदेश नपठाएका कम्पनीहरूलाई कारबाही स्वरूप अनुमति नवीकरण रोकेको हो ।
विदेश पठाउन एक वर्षमा कम्तीमा १ सय कामदारको सीमा पूरा गर्न नसक्ने कम्पनीहरू कानुनतः जोखिममा पर्ने व्यवस्था वैदेशिक रोजगार ऐन, २०६४ मा व्यवस्था गरिएको छ । यो प्रावधान २०७५ सालदेखि संशोधित रूपमा कार्यान्वयनमा आएको हो जसअनुसार दुई वर्षसम्म उक्त न्यूनतम सीमा पूरा गर्न नसके स्वचालित रूपमा इजाजतपत्र निष्क्रिय हुने व्यवस्था गरिएको छ ।
दक्ष, प्रभावकारी र अनुशासित श्रम बजार निर्माण गर्ने सरकारको लक्ष्यअनुसार विभागले यस्तो निर्णय लिएको हो ।
