युएईका राजकुमारले उपहार दिएकाे लाैराे नेपाल सरकारलाई उपहार दिने दुर्गा प्रसाईकाे घाेषणा
काठमाडाैं । दुर्गा प्रसाईले यूएईका राजकुमारले उपहारमा दिएको सुनको लौरो राज्यलाई दिने घोषणा गरेका छन् ।
बीएन्डसी मेडिकल कलेजका सञ्चालकसमेत प्रसाईलाई शनिबार दुबईका राजकुमार शेख मोहम्मद बिन माक्तुम जुमा ला माक्तुमले सुनको लौरो उपहार दिएका थिए । आइतबार प्रसाईले उक्त लौरो राज्यलाई उपहार दिने बताएका छन् ।
उनले भने, ‘मलाई दिएको उपहार हो त्यो, सुनको हो कि के को हो, के को हो भने सोध्ने कुरो पनि भएन । तर पूरै पहेँलो रंगको छ, त्यसलाई मैले राखेको छु, हेरेको छैन ।’
उनले यसबारे आफूले गृहमन्त्री बालकृष्ण खाँणसँग पनि कुरा गरेको बताए ।
‘लौरो लौरो भनेर धेरै कुरा आइसकेपछि मैले गृहमन्त्रीलाई राज्यलाई चाहिन्छ भने दिन्छु भनेको छु’ प्रसाईले भने, ‘गृहमन्त्रीले क्याबिनेटबाट निर्णय गरेर लिन्छु भनेका छन्, त्यसैले म दिन्छु ।’
उनले थपे, ‘मेरा बिजनेस पार्टनर (दुबईका राजकुमार) ले दिएको लौरो राज्यलाई दिन मलाई समस्या छैन ।’