राजा ल्याउन देश भित्र र बाहिर चलखेल भइरहेको छः प्रचण्ड

काठमाडौं । प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ ले देशभित्र र बाहिरबाट राजतन्त्र फर्काउने प्रयास भइरहेकाले सडकमा राजावादी गतिविधि बढेको बताएका छन्। प्रतिनिधि सभाको बैठकमा बोल्दै उनले सरकारको कमजोरीका कारण मात्रै नभई योजनाबद्ध रूपमा केही शक्तिहरू राजतन्त्र फर्काउने खेलमा लागेको आरोप लगाए।

उनका अनुसार, विभिन्न क्षेत्रका असन्तुष्ट पक्षहरूमार्फत सरकारविरुद्ध जनमानस भड्काउने प्रयास भइरहेको छ। उनले लघुवित्त पीडितका समस्या समाधान गर्न सरकार प्रतिवद्ध भए पनि केही समूहले यसलाई सरकारविरोधी आन्दोलनको रूप दिन खोजेको बताए। साथै, सहकारी क्षेत्रमा देखिएको संकट, शिक्षक आन्दोलन, तथा अन्य विविध असन्तुष्टिहरूलाई पनि राजावादी शक्तिहरूले सरकारविरोधी हतियारको रूपमा प्रयोग गरिरहेको उनले उल्लेख गरे।