सुजुकीका मोटरसाइकलको इन्जिनको क्याम भागमा समस्या
काठमाडौँ । भारतमा सुजुकीको २५० सिसी मोटरसाइकलहरूको लाइनअप फेरि एकपटक फिर्ता बोलाइएको छ। यो पहिलो पटक भने होइन – यसअघि २०२१ अप्रिलमा पनि अत्यधिक भाइब्रेसन (कम्पन) को समस्याका कारण गिक्सर २५०हरू फिर्ता बोलाइएको थियो।
हाल भारतमा उपलब्ध सुजुकीको मुख्य २५० सिसी लाइनअपमा तीनवटा छुट्टाछुट्टै मोटरसाइकलहरू छन् – स्ट्रिट नेकेड भर्सन गिक्सर २५०, फुली फेरड भर्सन गिक्सर एसएफ २५०, र त्यही प्लेटफर्ममा आधारित एडभेन्चर शैलीको भी-स्ट्रोम एसएक्स २५०। यी तीनवटै मोटरसाइकलहरूमा एउटै २४९ सिसी इन्जिन प्रयोग भएको हुनाले यी सबैलाई कम्पनीले हालसालै फिर्ता बोलाएको हो।
समस्या मुख्यतः पावरट्रेनसँग सम्बन्धित रहेको छ, विशेष गरेर क्याम क्षेत्र (क्याम एरिया) मा। केही मोटरसाइकलहरूमा एक्झस्ट क्याम लोब्स (निकास क्याम लोब) मा असामान्य घर्षण देखिएको छ। यसले गर्दा मोटरसाइकल अचानक स्टल हुन सक्ने वा अस्वाभाविक आवाज निकाल्न सक्ने सम्भावना देखिएको हो।
हाल भारतभरिका सुजुकी डिलरहरू प्रभावित मोटरसाइकल वा तीको ब्याचहरू पहिचान गर्ने कार्यमा छन्। प्रभावित मोटरसाइकलका मालिकहरूलाई सेवा केन्द्रमा बोलाएर आवश्यक स्पेयर पार्ट्स निःशुल्क रूपमा परिवर्तन गरिनेछ।
यद्यपि, कम्पनीले यो समस्या किन उत्पन्न भयो भन्ने स्पष्ट कारण सार्वजनिक गरेको छैन। त्यस्तै, कति मोटरसाइकल वा कति ब्याचहरू प्रभावित छन् भन्ने विवरण पनि अहिलेसम्म सार्वजनिक गरिएको छैन।
तीनवटै मोटरसाइकलहरूमा एउटै २४९ सिसीको तेल-चिस्याइएको इन्जिन (अयल कुल्ड इन्जिन) प्रयोग गरिएको छ, जसले २६.५ पिएस पावर र २२.२ एनएम टर्क उत्पादन गर्छ। यो इन्जिन ६-स्पीड ट्रान्समिशनसँग जोडिएको छ। यस पावरट्रेनमा सरल एसओएचसी (सिङ्गल ओभरहेड क्यामशाफ्ट) संरचना र सुजुकीको प्रसिद्ध अयल कुलिङ प्रविधि समावेश छ। यी मोटरसाइकलहरूमा साइकल पार्ट्स पनि झण्डै उस्तै छन्। तीनवटैमा डुअल-च्यानल एबीएस रहेको छ र भी-स्ट्रोम एसएक्स २५० मा पनि पछाडि एबीएस बन्द गर्ने विकल्प छैन। फेब्रुअरी २०२३ को अपडेटपछि यी तीनवटै मोटरसाइकलमा उस्तै इन्स्ट्रुमेन्ट क्लस्टर (ड्यासबोर्ड) दिइएको छ।
