दिल्लीमा भीषण वर्षा : घर भत्किँदा ४ जनाको मृत्यु, उडान अवरुद्ध
काठमाडौं । भारतको राजधानी दिल्ली एनसीआर क्षेत्र शुक्रबार बिहान भारी वर्षा र आँधीबेहरीले प्रभावित भएको छ, जसको कारण नजफगढ क्षेत्रमा तीन बालबालिका र एक महिलाको ज्यान गएको छ । बीबीसी र पीटीआईले उल्लेख गरेअनुसार घर भत्किँदा चार जनाको मृत्यु भएको हो । लगातारको वर्षासँगै आएको प्राकृतिक विपत्तिले जनधनको क्षति मात्रै नभई यातायात तथा हवाई सेवा समेत प्रभावित बनाएको छ ।
समाचार एजेन्सी पीटीआईका अनुसार दिल्ली विमानस्थलमा अवतरण गर्ने दुई उडान जयपुरतर्फ र एक उडान अहमदाबादतर्फ डाइभर्ट गरिएको छ । यसबाहेक झन्डै एक सय उडान ढिलो भएका छन् भने कतिपय यात्रुहरूलाई लामो समय विमानस्थलमै कुर्नु परेको छ । खराब मौसमका कारण विमानस्थलको आन्तरिक व्यवस्थापनमा समेत समस्या देखिएको छ ।
दिल्ली अन्तर्राष्ट्रिय विमानस्थल लिमिटेडका अनुसार, विमानस्थल अहिले पनि पूर्ण रूपमा सञ्चालनमा रहेको भए पनि खराब मौसमका कारण केही उडानहरू प्रभावित भएका छन् । यात्रुहरूलाई आफ्ना उडानको अवस्था सम्बन्धित एयरलाइन्सबाट जानकारी लिन अनुरोध गरिएको छ ।
वर्षा, आँधीबेहरी र त्यसबाट उत्पन्न संकटले घर, सवारीसाधन, पसल र सार्वजनिक संरचनामा व्यापक क्षति पुगेको जनाइएको छ । नजफगढमा भत्किएको घर पुरिएको अवस्थामा उद्धार गरिएको र पीडितहरूको परिवारलाई राहत उपलब्ध गराउने प्रक्रिया अगाडि बढाइएको अधिकारीहरूले बताएका छन् ।
यस घटनासँगै बीमा क्षेत्रका विज्ञहरूले प्राकृतिक विपत्तिबाट हुन सक्ने व्यक्तिगत र भौतिक क्षतिहरूको जोखिम कम गर्न बीमा सुरक्षाको आवश्यकता अझ बढेको बताएका छन् । घर भत्किएर ज्यान गुमाउने, सवारीसाधन क्षति हुने वा व्यवसायिक संरचनामा क्षति हुने घटनामा पूर्वतयारीका रूपमा बीमा हुनुको महत्व अझ स्पष्ट भएको छ । बीमा दाबीको प्रक्रियालाई सहज, छिटो र प्रभावकारी बनाउन बीमा कम्पनीहरूलाई पनि सजग हुनुपर्ने विज्ञहरूको भनाइ छ ।
विपद्को घडीमा बीमाले राहत पुर्याउने माध्यमका रूपमा काम गर्नुपर्ने र बीमा जनचेतना अझ बढाउन आवश्यक रहेको उल्लेख गर्दै बीमा नियामक निकायहरू पनि सतर्क बनेका छन् । यस घटनाले बीमाको पहुँच र प्रभावकारिता विस्तार गर्न थप पहल आवश्यक रहेको सन्देश दिएको छ ।
