डिजेल, मट्टितेल र पेट्रोलको भाउ बढ्यो
काठमाडौं । नेपाल आयल निगमले आइतबार मध्यरातदेखि लागू हुने गरी डिजेल, मट्टितेल र पेट्रोलको भाउ बढाएको छ।
निगमको सञ्चालक समितिको बैठकले डिजेल र मट्टितेलमा प्रतिलिटर १ रूपैयाँ र पेट्रोलमा प्रतिलिटर २ रूपैयाँ भाउ बढाएको हो।
भाउ बढेसँगै पहिलो, दोस्रो र तेस्रो वर्गअनुसार डिजेल र मट्टितेलको मूल्य क्रमशः प्रतिलिटर १४०.५० रूपैयाँ, १४२ रूपैयाँ र १४३ रूपैयाँ पुगेको छ। पेट्रोलको मूल्य पनि बढेर क्रमशः १५६.५० रूपैयाँ, १५८ रूपैयाँ र १५९ रूपैयाँ कायम भएको छ।
यता आन्तरिकतर्फको हवाई इन्धनमा भने प्रतिलिटर ३ रूपैयाँ घटाएर ११८ रूपैयाँ प्रतिलिटर तोकिएको छ।
अन्तर्राष्ट्रिय उडानका लागि प्रयोग हुने हवाई इन्धनको मूल्य काठमाडौँमा प्रतिकिलोलिटर ९०१ अमेरिकी डलर, पोखरामा ७२१ डलर र भैरहवामा ७०६ डलर कायम गरिएको छ।
इन्डियन आयल कर्पोरेसनबाट प्राप्त नयाँ मूल्य सूची अनुसार खरीद मूल्यमा आएको परिवर्तनलाई आधार मानी स्थानीय बजारमा मूल्य समायोजन गरिएको नेपाल आयल निगमले जनाएको छ।
