सर्वदलीय बैठकका तीन निर्णय, एक हप्ताभित्र संसदीय विशेष समिति बन्ने
काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा बसेको सर्वदलीय बैठकले बाढी–पहिरो प्रभावित क्षेत्रमा उद्धार, राहत, पुनर्स्थापना तथा पुनर्निर्माणका कामलाई प्रभावकारी बनाउन एक हप्ताभित्र ‘संसदीय विशेष समिति’ गठन गर्ने निर्णय गरेको छ।
बैठकमा भोटेकोशी लगायतका क्षेत्रमा आएको बाढी–पहिरोपछि सरकारले तथा विभिन्न राजनीतिक दलहरूले गर्दै आएका खोजी, उद्धार, राहत वितरण, पुनर्स्थापना र पुनर्निर्माणका कामबारे गम्भीर समीक्षा गरिएको रास्वपाका प्रवक्ता जगदीश खरेलले जानकारी दिए।
बैठकले रवि लामिछानेको संयोजकत्वमा रहेको सर्वदलीय राजनीतिक संयन्त्रलाई निरन्तरता दिने निर्णयसमेत गरेको छ। उक्त संयन्त्रमा रास्वपा, प्रमुख प्रतिपक्षी नेपाली कांग्रेस, नेकपा (एमाले), नेपाली कम्युनिस्ट पार्टी, श्रम संस्कृति पार्टी, राप्रपा, जसपा नेपाल, जनमत पार्टीलगायत संसद्मा प्रतिनिधित्व गर्ने तथा बाहिर रहेका दलहरूको सहभागिता रहनेछ।
संसद्मा प्रतिनिधित्व गर्ने दलहरूलाई उनीहरूको सिट संख्याका आधारमा समेटेर एक हप्ताभित्र संसदीय विशेष समिति गठन गर्ने सहमति भएको खरेलले बताए। उक्त समितिले विपद् प्रभावित क्षेत्रको स्थलगत अध्ययन, आवश्यक छानबिन तथा उद्धार, राहत, पुनर्स्थापना र पुनर्निर्माणका काममा समन्वय गर्नेछ।
समितिको कार्यक्षेत्र (टीओआर) भने अझै तय हुन बाँकी छ। समितिले विपद् व्यवस्थापनका क्रममा देखिएका समस्या र कमीकमजोरी पहिचान गरी आगामी दिनमा कहाँ–कहाँ सुधार आवश्यक छ भन्नेबारे सरकारलाई सुझाव दिनेछ।
बैठकमा प्रधानमन्त्रीको आसन्न संयुक्त राष्ट्रसङ्घको भ्रमणका विषयमा समेत छलफल भएको थियो। सहभागी दलका नेताहरूले नेपालले भोगिरहेको वातावरणीय क्षति तथा त्यसबाट परेको प्रभावलाई अन्तर्राष्ट्रियस्तरमा उठाउँदै ‘जलवायु न्याय’ र क्षतिपूर्तिको विषयलाई संयुक्त राष्ट्रसङ्घमा सशक्त रूपमा प्रस्तुत गर्न प्रधानमन्त्रीलाई सुझाव दिएका छन्।
