नेपालमा नै बनेको यात्रीको नयाँ पी–२ को मूल्य ३ लाख २९ हजार, १५७ किमिटरसम्म रेन्ज
काठमाडौं । सिप्रदी यात्रीले नेपाली बजारका लागि नयाँ विद्युतीय स्कुटर ‘यात्री पी–२’ सार्वजनिक गरेको छ। नेपालमै इन्जिनियरिङ र उत्पादन गर्ने उद्देश्यसहित तयार पारिएको यो स्कुटरको सुरुवाती मूल्य ३ लाख २९ हजार ९०० रुपैयाँ तोकिएको कम्पनीले जनाएको छ।
पी–२ लाई ग्राहकले आफ्नो प्रयोगअनुसार विभिन्न विकल्पमा छनोट गर्न सक्नेछन्। कम्पनीका अनुसार ब्याट्रीको क्षमता, बाहिरी रङ तथा आराम र डिजिटल सुविधासँग सम्बन्धित विकल्पमा ग्राहकले आवश्यकता अनुसार रोजाइ गर्न पाउनेछन्।
नेपाली सडकको भौगोलिक अवस्था र दैनिक आवतजावतलाई ध्यानमा राखेर स्कुटरको विकास गरिएको सिप्रदी यात्रीको भनाइ छ। शहरभित्रको बाक्लो ट्राफिकदेखि उकालो–ओरालो सडक र लामो दूरीको यात्रासम्मलाई लक्षित गर्दै यसको डिजाइन तथा प्रविधि तयार पारिएको कम्पनीले बताएको छ। सवारीमा ब्याट्री, इलेक्ट्रोनिक्स, सफ्टवेयर तथा कनेक्टेड प्रविधिलाई एउटै प्रणालीमा एकीकृत गरिएको छ।
पी–२ मा ग्राहकले तीन किसिमका ब्याट्रीमध्ये छनोट गर्न सक्नेछन्। ३ किलोवाट आवर क्षमताको ब्याट्रीबाट सामान्य शहरी प्रयोगमा करिब ९० किलोमिटर यात्रा गर्न सकिने कम्पनीको दाबी छ। त्यस्तै ३.७ किलोवाट आवर विकल्पले ११२ किलोमिटर र ५.२ किलोवाट आवरको ठूलो ब्याट्रीले १५७ किलोमिटरसम्म दूरी तय गर्न सक्ने बताइएको छ।
अझ बढी दूरी पार गर्नुपर्ने प्रयोगकर्ताका लागि अतिरिक्त ‘एक्सटेन्डर प्याक’को विकल्पसमेत राखिएको छ। यसबाट थप ५० किलोमिटरसम्म यात्रा गर्न सकिने कम्पनीको भनाइ छ। ब्याट्रीमा ८ वर्ष वा ८० हजार किलोमिटरमध्ये जुन पहिले पूरा हुन्छ, त्यतिसम्मको वारेन्टी उपलब्ध गराइनेछ।
स्कुटरमा पीएमएसएम प्रविधिमा आधारित मिड–ड्राइभ मोटर प्रयोग गरिएको छ। कम्पनीका अनुसार यसबाट पाङ्ग्रामा ३१५ एनएमसम्मको टर्क उपलब्ध हुन्छ। लामो समयसम्म उच्च भारमा समेत मोटरको कार्यक्षमता कायम राख्न सक्रिय शीतलीकरण प्रणालीसहितको हाई–पावर कन्ट्रोलर प्रयोग गरिएको छ।
पी–२ को संरचनामा बलियो स्टिल चेसिस राखिएको छ भने लामो यात्रा र विभिन्न किसिमका सडकमा सहज बनाउन लामो ट्राभल भएको सस्पेन्सन प्रयोग गरिएको छ। १४ इन्चका पाङ्ग्रासँगै अगाडि र पछाडि डिस्क ब्रेक दिइएको छ। ब्रेकिङ सुरक्षाका लागि कम्बाइन्ड ब्रेकिङ प्रणालीसमेत उपलब्ध छ।
चार्जिङका लागि स्कुटरमै चार्जर जडान गरिएको कम्पनीले जनाएको छ। त्यसकारण घरबाट चार्ज गर्दा छुट्टै चार्जर वा एडाप्टर बोकेर हिँड्नुपर्ने अवस्था नहुने बताइएको छ। ब्याट्रीको प्रकारअनुसार घरमै साढे दुई घण्टाभन्दा कम अवधिमा चार्ज पूरा गर्न सकिने कम्पनीको दाबी छ।
पी–२ मा डीसी फास्ट चार्जिङको सुविधा पनि समावेश गरिएको छ। कम्पनीले तोकिएको परिस्थितिमा फास्ट चार्जर प्रयोग गरेर करिब ४१ मिनेटमै ब्याट्री चार्ज गर्न सकिने जनाएको छ। सिप्रदी यात्रीले आगामी दिनमा नेपालका विभिन्न स्थानमा चार्जिङ पूर्वाधार विस्तार गर्ने योजना पनि सार्वजनिक गरेको छ।
डिजिटल सुविधातर्फ स्कुटरमा ७ इन्चको टीएफटी स्क्रिन राखिएको छ। उक्त डिस्प्लेमा वायरलेस एप्पल कारप्ले तथा एन्ड्रोइड अटो चलाउन सकिनेछ। यसमार्फत बाटो पहिल्याउने सुविधा तथा स्कुटरसँग सम्बन्धित विभिन्न जानकारी हेर्न सकिने कम्पनीले जनाएको छ।
स्कुटरमा जडान गरिएका सेन्सरले दिशा, रोल र पिचलगायतका विवरण तत्काल उपलब्ध गराउनेछन्। फोरजी नेटवर्कमार्फत सवारीलाई यात्रीको डिजिटल प्रणालीसँग जोड्न सकिनेछ।
मोबाइल एप प्रयोग गरेर प्रयोगकर्ताले स्कुटर कहाँ छ भन्ने जानकारी लिन, ब्याट्रीको अवस्था जाँच्न, यात्राको मार्ग तयार गर्न तथा मर्मतसम्बन्धी समय लिन सक्नेछन्। चाबीको प्रत्यक्ष प्रयोगबिना स्कुटर सञ्चालन गर्न ‘प्रोक्सिमिटी डिटेक्सन’ प्रविधिको व्यवस्था गरिएको छ।
पी–२ मा चालकको आवश्यकता र सडकको अवस्थाअनुसार प्रयोग गर्न मिल्ने विभिन्न राइडिङ मोड राखिएको छ। त्यस्तै चार्जिङलाई व्यवस्थापन गर्ने स्मार्ट चार्जिङ प्रणाली, फरक–फरक स्तरमा प्रयोग गर्न सकिने रिजेनेरेटिभ ब्रेकिङ, हिल होल्ड र क्रुज कन्ट्रोल पनि यसका प्रमुख सुविधामा रहेका छन्। सुरक्षाका लागि चोरीसम्बन्धी सूचना दिने प्रणाली तथा मोटर निष्क्रिय पार्न सकिने लक सुविधा पनि समावेश गरिएको छ।
काठमाडौंको टेकुमा निर्माणाधीन सिप्रदी यात्रीको नयाँ एक्सपेरियन्स सेन्टर आगामी अक्टोबरको पहिलो साताबाट सञ्चालनमा ल्याउने तयारी गरिएको छ। उक्त केन्द्रमा पुगेर ग्राहकले स्कुटर प्रत्यक्ष हेर्नुका साथै टेस्ट राइड र बुकिङ गर्न सक्नेछन्।
नाडा अटो शोका क्रममा बुकिङ गरेका ग्राहकलाई प्राथमिकताका आधारमा सवारी उपलब्ध गराइने कम्पनीले जनाएको छ। ३.७ किलोवाट आवर र ५.२ किलोवाट आवर ब्याट्री भएका संस्करणको बिक्री वितरण अक्टोबरको मध्यदेखि नोभेम्बरसम्म सुरु गर्ने तयारी छ। अन्य संस्करण भने डिसेम्बर २०२६ बाट ग्राहकलाई उपलब्ध गराउने योजना रहेको कम्पनीले जनाएको छ।
