मधुमेहको औषधी ‘ग्लिपिड–१’ गुणस्तरहीन, बजारबाट फिर्ता गर्न निर्देशन
काठमाडौं । औषधीको गुणस्तर परीक्षणका क्रममा तोकिएको मापदण्ड पूरा नगरेको पाइएपछि ‘ग्लिपिड–१’ औषधीको एक समूह बजारबाट तत्काल फिर्ता गर्न औषधी व्यवस्था विभागले निर्देशन दिएको छ।
विभागका अनुसार राष्ट्रिय औषधी प्रयोगशालामा परीक्षणका लागि प्राप्त नमुना परीक्षण गर्दा टाइम फार्मास्युटिकल्स प्रालि, नवलपरासीले उत्पादन गरेको ‘ग्लिपिड–१’ औषधीको समूह नम्बर जीएम–०७० न्यून गुणस्तरको पाइएको हो।
उक्त औषधीमा ग्लिमेपिराइड १ मिलिग्राम रहेको छ। जीएम–०७० समूहको औषधी अप्रिल २०२६ मा उत्पादन भएको र सेप्टेम्बर २०२७ सम्म प्रयोग गर्न सकिने म्याद रहेको विभागले जनाएको छ।
प्रयोगशालामा गरिएको परीक्षणका क्रममा उक्त औषधी संयुक्त राज्य अमेरिकाको औषधी मापदण्डसम्बन्धी पुस्तक (USP) को सन् २०२६ संस्करणमा तोकिएको घुलनशीलता परीक्षणको निर्धारित मापदण्डअनुसार नभएको पाइएको विभागले जनाएको छ।
गुणस्तरमा समस्या देखिएपछि विभागले जीएम–०७० समूहको औषधीको बिक्री–वितरण रोक्न तथा बजारमा रहेका औषधी तत्काल फिर्ता गर्न उत्पादक र सम्बन्धित व्यवसायीलाई निर्देशन दिएको छ।
विभागले उक्त समूहको औषधीको सिफारिस, बिक्री–वितरण तथा प्रयोग नगर्न सम्बन्धित सबैलाई सूचित गरेको छ। बजारबाट फिर्ता गरिएको औषधीको विवरणसमेत विभागमा पेश गर्न भनिएको छ।
‘ग्लिपिड–१’ मधुमेह नियन्त्रणका लागि प्रयोग हुने ग्लिमेपिराइडयुक्त औषधी हो। विभागले गुणस्तर परीक्षणमा समस्या देखिएको जीएम–०७० समूहको औषधी मात्र बजारबाट फिर्ता गर्न निर्देशन दिएको जनाएको छ।
