ऋणीको सम्पत्ति लिलाम गरेर बैंकले नाफा खानु भ्रष्टाचार हो, राष्ट्र बैंकले माफी दिन सक्दैनः गभर्नर

काठमाडौं । नेपाल राष्ट्र बैंकका गभर्नर प्रा.डा. विश्वनाथ पौडेलले ऋणीको सम्पत्ति लिलाम गरेर बैंकले आफूलाई फाइदा हुने काम गर्नु भ्रष्टाचारजन्य काम भएको र यसलाई राष्ट्र बैंकले माफी दिन नसक्ने बताएका छन् । आइतबार नेपाल आर्थिक पत्रकार संघ (नाफिज) को १६औं वार्षिक साधारण सभामा बोल्दै गभर्नर पौडेलले यस्तो गतिविधिलाई कठोर रूपमा लिने बताएका हुन् ।

‘सरकारी बैंकहरूबाट यो मिलाइदिन्छु भनेर पैसा माग्यो भने सरकारले रिस्क लिन्छ। तर निजी बैंकहरूबाट त्यस्तो भएमा हामी गम्भीर रूपमा लिनेछौं ।’ ऋण लिंदा सुरक्षणका लागि राखिएको जमानत बैंकले जबरजस्ती लिलाम गरी बेचेर नाफा खाने कार्यतर्फ अंकित गर्दै भने, ‘कसैले पनि जबरजस्ती अर्काको कोल्याटरल बेचेर फाइदा उठाउन खोज्नु पार्ट अफ करप्सन हो यसलाई नेपाल राष्ट्र बैंकले क्षम्य रूपमा लिंदैन ।’

त्यस्तै गभर्नर पौडेलले आर्थिक गतिविधि चलायमान बनाउनका लागि राष्ट्र बैंकले विभिन्न नीति परिमार्जन गरेको बताए । उनले भने, ‘मौद्रिक नीतिको पहिलो त्रैमासिक समीक्षामा वित्तीय संस्थाहरूको नाफा बढाउनका लागि सहज बनाएका छौं । महानगरमा रहेका धेरै बैङ्कहरूका शाखा बन्द गर्ने बाटो खोलिदिएका छौं ।’

बैंकहरूको हकमा हामीले राम्रो नाफा र लगानी गरेर डिजिटल कारोबारमा ध्यान दिंदै अर्थतन्त्रको गतिमा सहयोग पुगोस् भनेर नै नेपाल राष्ट्र बैंकले काम गरिरहेको गभर्नर पौडेलले बताए । ‘बैंक तथा वित्तीय संस्थाहरूको नाफामा ध्यान दिइरहेका छौं तर यसमा सही के हो र गलत के हो भनेर पोलिसी तयार पार्छौं । सबैको गुनासो हेरेर हामी अगाडी बढ्ने गरेका छौं ।’, गभर्नर पौडेलले भने ।

बैंक तथा वित्तीय संस्थाहरूमा थुप्रिएको पैसा लगानी गर्नका लागि नेपाल राष्ट्र बैंक केन्द्रित रहेको उनले बताए । ‘अर्थतन्त्रको मुभमेन्ट मास साइकोलोजीमा भर पर्छ । गएको १० वर्षमा धेरै परिवर्तन भएको छ । यो बिचमा हिमालयन जाभादेखि आईटी क्षेत्रमा उल्लेख्य प्रगति भएको छ । विभिन्न ठाउँमा सडक तथा पूर्वाधारमा राम्रो प्रगति भएको छ ।’, उनले भने । श्रीलंका अप्ठ्यारो अवस्थामा पुगेर पनि सुधारको गति समातेकाले नेपालले पनि गति समात्नेमा गभर्नरले आश्वासन दिए ।

अहिले मनोबल कमजोर रहेकाले यसलाई उकास्नका लागि आवश्यकता रहेको गभर्नर पौडेलले बताए । उनले भने, ‘हामी आर्थिक नीतिहरूमा बलियो छौं तर मनोबल कमजोर छ । कमजोर मनोबललाई उकास्न राम्रो विषयहरूमा केन्द्रित रहनु पर्छ । जस्तै निर्यातमा राम्रो गरिरहेका अलैंची जस्तालाई बढावा दिनुपर्छ जे चाहिन्छ त्यसका लागि हामी राम्रा लाइनमा जान सकिन्छ ।’

सर्वसाधारणदेखि उच्च पदस्थ व्यक्तिहरूले समेत नेपालमा केही नहुने भन्दै आफ्ना सन्तान विदेश पलायन गराएको गभर्नर पौडेलको आरोप छ । उनले कार्यक्रममा बोल्दै भने, ‘एक दशकभन्दा बढी यो देशमा केही हुँदैन भनेर छोराछोरी सबैलाई विदेश पठाइयो । उनीहरू सबैलाई फर्काएर ल्याउनु पर्छ तर उनीहरूलाई ल्याएर मन्त्री बनाउने र राजनीतिक रेसमा लैजान हुँदैन ।’

कुनै पनि कुरा रातारात गर्छु भन्ने कुनै फर्मुला नहुने भएकाले बिस्तारै गर्दै जानुपर्ने गभर्नर पौडेलको भनाई छ । ‘फेलियर’ हुनु भनेको पार्ट अफ बिजनेस भएकाले नराम्रो होइन राम्रो स्टोरीहरूको प्राथमिकता दिनुपर्ने उनले बताए । उनले भने, ‘म मीनबहादुर जीलाई हेर्छु उहाँले दुई महिनामा गरेर देखाउँछु भन्नु भएको थियो त्यस अनुसार उहाँले गरेरै पनि देखाउनु भयो ।’

कालोसूचीको व्यवस्थाबारे नेपाल राष्ट्र बैंकले अध्ययन गरिरहेको बताउँदै उनले भने, ‘हाम्रोमा धेरै कालोसूचीमा परेका छन् । निर्माण उद्योगहरूमा माइक्रोफाइनान्स जस्तो मोडल भइरहेको छ । एउटाले राम्रो गरेन भनेर सबैलाई राखेजस्तो भएको छ ।’