भदौभित्र स्वास्थ्य बीमाको १२ अर्बसम्म बक्यौता भुक्तानी गर्ने तयारी
काठमाडौं । सरकारले स्वास्थ्य बीमा कार्यक्रमअन्तर्गत बाँकी रहेको रकममध्ये १० देखि १२ अर्ब रुपैयाँ आगामी भदौभित्र भुक्तानी गर्ने तयारी गरेको छ ।
प्रतिनिधिसभाको शिक्षा, स्वास्थ्य तथा सूचना प्रविधि समितिको बैठकमा स्वास्थ्य तथा खाद्य स्वच्छता मन्त्रालयका सचिव डा. विकास देवकोटाले बीमा कार्यक्रमलाई व्यवस्थित र दीगो बनाउन विभिन्न सुधारको काम अघि बढाइएको जानकारी दिए ।
उनका अनुसार अघिल्लो आर्थिक वर्षमा स्वास्थ्य बीमाका लागि करिब २४ देखि २५ अर्ब रुपैयाँ भुक्तानी भइसकेको छ । करिब १५ अर्ब रुपैयाँ अझै बाँकी रहेकामा आवश्यक रुजु पूरा गरेर भदौभित्र १० देखि १२ अर्ब रुपैयाँ भुक्तानी गर्ने लक्ष्य रहेको छ ।
सरकारले स्वास्थ्य बीमामा निजी अस्पतालतर्फको खर्च घटाउँदै सरकारी अस्पतालको सेवा सुधार गर्ने नीति लिएको छ । बीमा सेवाग्राहीमध्ये करिब ७ प्रतिशत निजी अस्पताल जाने गरे पनि बीमाको कुल खर्चको करिब एक चौथाइ त्यहाँ खर्च हुने मन्त्रालयको तथ्यांक छ ।
बीमा कार्यक्रमलाई आत्मनिर्भर बनाउन सहभागिता बढाउने, औपचारिक क्षेत्रका कर्मचारीको तलबबाटै प्रिमियम कट्टी गर्ने र विपन्न नागरिकको प्रिमियम सरकारले व्यहोर्ने व्यवस्था गर्ने तयारी पनि भइरहेको छ । यसबाट वार्षिक २ देखि ३ अर्ब रुपैयाँ थप संकलन हुने अपेक्षा बोर्डले गरेको छ । त्यस्तै स्वास्थ्य बीमा ऐन संशोधन गरी स्थानीय तहका आधारभूत अस्पतालबाट सामान्य स्वास्थ्य परीक्षण र होलबडी चेकअप निःशुल्क गर्ने योजना पनि अघि बढाइएको छ ।
