नारायणगढ–मुग्लिन सडकखण्ड अबदेखि आंशिक बन्द, यस्तो छ सवारी खुल्ने समयतालिका
काठमाडौं । तुइन खोला क्षेत्रमा पहिरो रोकथामको काम गर्नुपर्ने भएकाले नारायणगढ–मुग्लिन सडकखण्ड आज (सोमबार) बिहानदेखि आंशिक रूपमा बन्द गरिएको छ।
जिल्ला प्रशासन कार्यालय, चितवनले आइतबार एक सूचना जारी गर्दै उक्त सडकखण्डमा सवारी आवागमनको नयाँ समयतालिका सार्वजनिक गरेको हो। प्रशासनका अनुसार, पहिरो नियन्त्रणको कामलाई तीव्रता दिन बाँकी समय सडक बन्द गरी निश्चित समयमा मात्र गाडी चल्न दिइनेछ।
सवारीसाधन सञ्चालन बिहान ८ बजेदेखि साढे ८ बजेसम्म, बिहान साढे १० बजेदेखि ११ बजेसम्म, दिउँसो १ बजेदेखि साढे १ बजेसम्म, दिउँसो ३ः५० बजेदेखि ४ बजेसम्म र साँझ ६ बजेपछि भने निरन्तर रुपमा सञ्चालन हुनेछ।
यी तोकिएका समयबाहेक अन्य समयमा उक्त स्थानमा सवारीसाधन पूर्ण रूपमा रोकेर मर्मत कार्य गरिने प्रशासनले प्रष्ट पारेको छ। धादिङस्थित कृष्णभीरको सडक मर्मत कार्य सम्पन्न भई सवारी आवागमन पूर्ण रूपमा सञ्चालन नहुञ्जेलसम्म यो समयतालिका निरन्तर लागू हुने जारी सूचनामा उल्लेख छ। ्
सडकमा हुने सम्भावित जाम र सास्तीबाट बच्न यात्रु तथा चालकलाई तोकिएको खुल्ने समयलाई ध्यानमा राखेर मात्र यात्रा गर्न जिल्ला प्रशासन कार्यालय चितवनले अनुरोध गरेको छ।
