भन्सार छली नेपाल भित्र्याउन लागिएको साढे १६ लाखको सामान बरामद

सशस्त्र प्रहरी बल नेपाल नम्बर ७ गण हेडक्वार्टर सिराहाका प्रमुख सशस्त्र प्रहरी उपरीक्षक सुमन थापाका अनुसार दक्षिणी सीमा क्षेत्रमा खटिएको टोलीले छुट्टाछुट्टै स्थानबाट १६ लाख ५० हजार ४६३ रुपैयाँबराबरको भन्सार छलीका सामान बरामद गरेको हो।

बरामद सामानमा लत्ताकपडा, किराना सामान, सुर्ती, कस्मेटिक सामग्री, खेलौना, हार्डवेयरका सामान, पेय पदार्थ, मदिरा, फोटो फ्रेम तथा औषधिलगायत रहेका छन्। बरामद सामान आवश्यक प्रक्रिया पूरा गरी सिराहा भन्सार कार्यालयमा दाखिला गरिएको सशस्त्र प्रहरीले जनाएको छ।

सीमानाकाबाट हुने अवैध निकासी तथा चोरीपैठारी नियन्त्रणका लागि पछिल्लो समय निगरानी र गस्ती बढाइएको सशस्त्र प्रहरीले जनाएको छ।

गणका अनुसार साउन र भदौ गरी दुई महिनामा सिराहाका विभिन्न सीमावर्ती क्षेत्रबाट सशस्त्र प्रहरीको गस्ती टोलीले करिब दुई करोड ९५ लाख रुपैयाँबराबरको अवैध सामान बरामद गरेको छ।

त्यस्तै, असोज ११ गतेसम्मको अवधिमा गस्तीका क्रममा ५३ लाख रुपैयाँबराबरका लत्ताकपडा, किराना सामान, सुर्ती, खेलौना, कस्मेटिक सामग्री, हार्डवेयरका सामान, पेय पदार्थ, मदिरा, फोटो फ्रेम तथा औषधिलगायतका सामान बरामद गरी भन्सार कार्यालयमा दाखिला गरिएको सशस्त्र प्रहरीले जनाएको छ।