एनएमबी बैंकको नाफा २७ प्रतिशतले बढ्यो, पहिलो त्रैमासमै कमायो १ अर्ब १६ करोड
काठमाडौं । एनएमबी बैंक लिमिटेडले चालु आर्थिक वर्ष २०८३/८४ को पहिलो त्रैमासमा १ अर्ब १६ करोड ६४ लाख रुपैयाँ खुद नाफा आर्जन गरेको छ । यो गत आर्थिक वर्षको सोही अवधिको ९१ करोड ५९ लाख रुपैयाँको तुलनामा २७.३४ प्रतिशतले बढी हो ।
बैंकले सार्वजनिक गरेको अपरिष्कृत वित्तीय विवरणअनुसार नाफामा भएको वृद्धिसँगै प्रतिसेयर आम्दानी (ईपीएस) र वितरणयोग्य नाफामा समेत सुधार आएको छ । बैंकको वार्षिकीकरण गरिएको ईपीएस २३ रुपैयाँ ८३ पैसा पुगेको छ । गत वर्षको सोही अवधिमा यस्तो आम्दानी १९ रुपैयाँ रहेको थियो ।
त्यस्तै, बैंकको प्रतिसेयर वितरणयोग्य नाफा ११ रुपैयाँ ६४ पैसा पुगेको छ । अघिल्लो वर्षको पहिलो त्रैमासमा यस्तो नाफा ८ रुपैयाँ ९ पैसा रहेको थियो । यसले बैंकको लाभांश वितरण गर्न सक्ने क्षमतामा सुधार आएको देखाउँछ ।
पहिलो त्रैमासमा बैंकको कर्जा तथा निक्षेप दुवै विस्तार भएका छन् । बैंकको कुल कर्जा ८ अर्ब ९ करोड रुपैयाँले बढेर २ खर्ब ७६ अर्ब ४ करोड रुपैयाँ पुगेको छ । त्यस्तै, निक्षेप ६ अर्ब ३ करोड रुपैयाँले वृद्धि भई ३ खर्ब २४ अर्ब रुपैयाँ पुगेको छ । बैंकका अनुसार कर्जा विस्तारको गति समग्र बैंकिङ क्षेत्रको औसतभन्दा उच्च रहेको छ ।
यस अवधिमा बैंकको खराब कर्जा अनुपात (एनपीएल) अघिल्लो त्रैमासको ४.५८ प्रतिशतबाट बढेर ४.९२ प्रतिशतमा झरेको छ । खराब कर्जामा आएको यो कमीले कर्जाको गुणस्तरमा सामान्य सुधार भएको संकेत गर्छ ।
बैंकको सञ्चालन नाफा पनि २६.१७ प्रतिशतले बढेर १ अर्ब ८९ करोड रुपैयाँ पुगेको छ ।
