एसवाई प्यानलको आईपीओमा १ अर्ब ३२ करोड रुपैयाँ संकलन, कति जनाले दिए आवेदन ?
काठमाडौं । एसवाई प्यानल नेपाल लिमिटेडको आईपीओमा १ अर्ब ३२ करोड ९५ लाख ३९ हजार रुपैयाँ संकलन भएको छ । सिडिएसका अनुसार आज अर्थात् कात्तिक २० गते साँझ ४ः०१ बजेसम्ममा ११ लाख ३७ हजार २९६ जनाले १ करोड ३२ लाख ९५ हजार ३९० कित्ताका लागि आवेदन दिएका हुन् ।
कम्पनीले प्रथम चरणको आईपीओ निष्कासन गरी बाँडफाँड गरिसकेकाले दोस्रो चरणमा सर्वसाधारणका लागि कात्तिक १९ गतेबाट जारी गरेको हो । कम्पनीले प्रतिकित्ता १०० रुपैयाँका दरले कुल ५२ लाख ३२ हजार ५४८ कित्ता आईपीओ निष्कासन गर्न नेपाल धितोपत्र बोर्डबाट अनुमति पाएको हो। जसमध्ये पहिलो चरणमा आयोजना प्रभावितलाई २ लाख ६१ हजार ६२७ कित्ता र वैदेशिक रोजगारीमा रहेकालाई ४ लाख ९७ हजार ९२ कित्ता बाँडफाँड गरिसकेको छ।
कम्पनीले बाँकी कित्तामध्ये कम्पनीमा कार्यरत कर्मचारीका लागि १ लाख ४९ हजार १२७ कित्ता र सामूहिक लगानी कोषका लागि २ लाख ४८ हजार ५४६ कित्ता आईपीओ सुरक्षित गरी बाँकी रहेको ४० लाख ७६ हजार १५६ कित्ता आईपीओ सर्वसाधारणमा बिक्री खुला गरेको हो।
यसमा सर्वसाधारणले आवेदन दिंदा घटीमा १० कित्ता र बढीमा ५० हजार कित्तासम्म माग गर्न सकिनेछ अर्थात् यो आईपीओ भर्न कम्तीमा १ हजार र बढीमा ५० लाख रुपैयाँसम्म लाग्नेछ। यसमा आज बिहान १० बजेदेखि यही कात्तिक २३ गते बैंकिङ्ग समयसम्म मात्रै आवेदन दिन सकिनेछ।
कम्पनीको आईपीओलाई क्रेडिट रेटिङ संस्था इक्रा नेपाल लिमिटेडले ‘इक्राएनपी–आईआर बीबीप्लस’ रेटिङ दिएको छ जसले कम्पनीको समयमै वित्तीय दायित्व पूरा गर्ने मध्यम सुनिश्चितता रहेको संकेत गर्छ। यसमा आईपीओ निष्कासन तथा बाँडफाँडको काम प्रभु क्यापिटल लिमिटेडले गर्नेछ।
