निर्जीवन बीमकको व्यवसाय १२% ले बढ्यो, अग्रस्थानमा सलिको र शिखर, हिमालयन एभरेष्टको उच्च ग्रोथ
काठमाडौं । चालु आर्थिक वर्ष २०८२।०८३ को चार महिना अर्थात कात्तिक मसान्तसम्मको अवधिमा निर्जीवन बीमा कम्पनीहरुको व्यवसाय साढे १२ प्रतिशतले बृद्धि भएको छ । नेपाल बीमा प्राधिकरणले सार्वजनिक गरेको वित्तीय विवरण अनुसार हाल नेपालमा सञ्चालित १४ निर्जीवन बीमा कम्पनीहरुको कुल बीमा व्यवसाय १२.४२ प्रतिशतले बढेर १५ अर्ब ८४ करोड ८२ लाख रुपैयाँ रहेको छ । कम्पनीले गत आर्थिक वर्षको सोही अवधिमा १४ अर्ब ९ करोड ७२ लाख रुपैयाँ बराबरको कुल बीमा शुल्क आर्जन गरेको थियो ।
चालु आर्थिक वर्षको कात्तिक मसान्तसम्मको अवधिमा निर्जीवन बीमा कम्पनीहरुमध्ये सगरमाथा लुम्बिनी इन्स्योरेन्सले सबैभन्दा बढी बीमा शुल्क आर्जन गरेको छ । चार महिनामा कम्पनीको ब्यवसाय ०.३८ प्रतिशतले बढेर १ अर्ब ७८ करोड ३६ लाख रुपैयाँ पुगेको छ ।
त्यस्तै, सर्वाधिक धेरै ब्यवसाय संकलन गर्नेमा शिखर इन्स्योरेन्स दोस्रो नम्बरमा रहेको छ । कम्पनीको ब्यवसाय २३.२८ प्रतिशतले बढेर १ अर्ब ७३ करोड ८६ लाख रुपैयाँ रहेको छ ।
साथै गत आर्थिक वर्षको तुलनामा एनएलजी इन्स्योरेन्स र हिमालयन एभरेष्ट इन्स्योेरेन्सको व्यवसाय सर्वाधिक अंकले बृद्धि भएको छ । हिमालयनको ब्यवसाय ३९.६६ प्रतिशतले बढेर १ अर्ब ६० करोड र एनएलजीको ३४.१ प्रतिशतले बढे १ अर्ब २६ करोड रुपैयाँ पुगेको छ ।
त्यस्तै, सिद्धार्थ प्रिमियर इन्स्योरेन्सको ब्यवसाय ५.८२ प्रतिशतले बढेर १ अर्ब ५४ करोड, आइजीआई प्रुडेन्सियलको १२.२२ प्रतिशतले बढेर १ अर्ब २७ करोड, नेको इन्स्योरेन्सको ०.३९ प्रतिशतले घटेर १ अर्ब १४ करोड, युनाइटेड अजोडको २७.८० प्रतिशतले बढेर १ अर्ब ७ करोड र सानिमा जिआईसीको ३० प्रतिशतले बढेर १ अर्ब २ करोड रुपैयाँ रहेको छ ।
त्यस्तै, द ओरियन्टलको ९२ करोड, नेपाल इन्स्योरेन्सको ८६ करोड, प्रभु इन्स्योरेन्सको ६५ करोड, नेशनल इन्स्योरेन्सको ५० करोड र राष्ट्रिय बीमा कम्पनीको ४३ करोड रुपैयाँ ब्यवसाय रहेको छ ।
