नेपालको जलवायु पीडा विश्वमञ्चमा उठाउँछु: बालेन शाह
काठमाडौँ । बालेन्द्र शाहले जलवायु परिवर्तनका कारण नेपालले भोगिरहेको जोखिम, क्षति तथा विपद्का विषयलाई अन्तर्राष्ट्रिय मञ्चमा प्राथमिकताका साथ उठाउने प्रतिबद्धता व्यक्त गरेका छन्।
मुस्ताङको जोमसोममा आयोजित ‘घरपझोङ जलवायु सम्मेलन’का अवसरमा पठाएको शुभकामना सन्देशमार्फत शाहले जलवायु परिवर्तनबाट सिर्जित समस्या समाधान विश्व समुदायको साझा जिम्मेवारी भएको बताएका हुन्। उनले जलवायुजन्य जोखिम न्यूनीकरण तथा विपद् व्यवस्थापनका लागि अन्तर्राष्ट्रिय सहयोग र सहकार्य आवश्यक रहेको उल्लेख गरेका छन्।
शाहले संयुक्त राष्ट्रसंघको ८१औँ महासभामा नेपालले जलवायु परिवर्तनका कारण भोग्नुपरेका समस्या, क्षति तथा समाधानका उपायबारे विश्व समुदायको ध्यानाकर्षण गराउने बताएका छन्। हिमाली, पहाडी र तराई क्षेत्रमा जलवायु परिवर्तनले पारिरहेको गम्भीर प्रभावबारे राष्ट्रिय तथा अन्तर्राष्ट्रिय समुदायलाई जानकारी गराउने उनको भनाइ छ।
तापक्रम वृद्धिका कारण नेपालका हिमाल पग्लिने, हिमचट्टान टुक्रिने तथा हिमताल र हिमनदीमा जोखिम बढ्ने क्रम तीव्र हुँदै गएको प्रधानमन्त्री शाहले बताएका छन्। त्यसैगरी नदीको बहावमा परिवर्तन, पानीका मुहान सुक्दै जाने र मौसममा अप्रत्याशित परिवर्तन हुने समस्या पनि बढिरहेको उनले उल्लेख गरेका छन्।
जलवायु परिवर्तनको असर हिमाली क्षेत्रमा मात्र सीमित नरहेको बताउँदै शाहले स्थानीय जनजीवन, कृषि तथा जैविक विविधतामा समेत यसको प्रभाव देखिन थालेको बताएका छन्।
