के आई सिँहको वार्षिक आम्दानी २६ लाख, खाना–खाजा र सभा सञ्चालनमै ३७ लाख स्वाहा

काठमाडौं । डोटी जिल्लाको के आई सिँह गाउँपालिकाले खाना, खाजा र सभा सञ्चालनमा वर्षदिनमै ३७ लाखबढी रुपैयाँ खर्चिएको छ । आर्थिक अनुशासन र मितव्ययिता अपनाउनु पर्ने स्थानीय सरकारले खाना–खाजा र सभा सञ्चालनमै आन्तरिक आयस्रोतको ठूलो रकम खर्च गरेको पाइएको हो ।

महालेखा परीक्षकको कार्यालयले सार्वजनिक गरेको आर्थिक वर्ष २०८०–८१ को लेखा परीक्षण प्रतिवेदन अनुसार के आई सिँह गाउँपालिकाले खाना, खाजा र सभा सञ्चालन लगायत विविध शीर्षकमा ३७ लाख २५ हजार रुपैयाँ खर्चिएको छ । के आइ सिँह गाउँपालिकाले गत आर्थिक वर्ष २०८०–०८१ मा २६ लाख ७३ हजार रुपैयाँ मात्र आन्तरिक आय गरेको विवरणमा उल्लेख छ । गाउँपालिकाको खाना–खाजा र सभा सञ्चालनको खर्च मात्रै आन्तरिक आयको १३९ प्रतिशत हुन गएको छ ।

महालेखा परिक्षकको प्रतिवेदनले गाउँपालिकालाई विविध खर्चलाई आन्तरिक आयको आकारसँग तादाम्यता कायम गरी खर्चको औँचित्यसमेत पुष्टि हुनेगरी निश्चित वस्तुगत मापदण्ड बनाई आर्थिक मितव्ययिता कायम गर्न सुझाव दिएको छ । भौगोलिक संरचनाले ७ वटा वडा कार्यालय रहेको के आई सिँह गाउँपालिकाले आन्तरिक आयका स्रोत जुटाउन असफल रहेको विवरणले देखाएको छ ।

के आई सिँह गाउँपालिको अध्यक्षमा हाल लोकेन्द्र बहादुर शाही र उपाध्यक्षमा मिना देवि बिष्टले रहेकी छिन् । अध्यक्ष शाही र उपाध्यक्ष विष्टलाई गाउँपालिकाले नेतृत्व गरेको करिव ८ वर्षको हाराहारीमा पुगिसकेको छ ।