जेनजी आन्दोलनको एक वर्ष पूरा, ज्यान गुमाएकाको सम्झनामा शहीद दिवस मनाइँदै

काठमाडौं । जेनजी आन्दोलनका क्रममा ज्यान गुमाएका युवाहरूको सम्झना तथा सम्मानमा सरकारले आज भदौ २३ गते जेनजी शहीद दिवस मनाउँदै देशभर सार्वजनिक बिदा दिएको छ। गत वर्ष यही दिनदेखि शुरु भएको जेनजी आन्दोलनले नेपालको राजनीतिक घटनाक्रममै ठूलो परिवर्तन ल्याएको थियो।

सरकारले गत भदौ १८ गते बसेको मन्त्रिपरिषद् बैठकबाट २३ गतेलाई जेनजी शहीद दिवसका रूपमा मनाउने निर्णय गरेको थियो। सोही निर्णयअनुसार आज संघ, प्रदेश र स्थानीय तहका सरकारी कार्यालय, शैक्षिक संस्था लगायत सार्वजनिक सेवाहरू बन्द रहनेछन्।

गत वर्ष भदौ २३ गते जेनजी पुस्ताका युवाहरू सामाजिक सञ्जालमाथि लगाइएको प्रतिबन्धको विरोध गर्दै सडकमा उत्रिएका थिए। शुरुमा सामाजिक सञ्जाल प्रयोगमाथिको प्रतिबन्ध फुकुवा र अभिव्यक्ति स्वतन्त्रताको मागसहित शुरु भएको प्रदर्शन क्रमशः भ्रष्टाचार, राजनीतिक नेतृत्वप्रतिको असन्तुष्टि, नातावाद–कृपावाद, बेरोजगारी, सार्वजनिक सेवा तथा राज्य सञ्चालनको शैलीविरुद्धको व्यापक आन्दोलनमा परिणत भएको थियो।

काठमाडौंसहित देशका विभिन्न स्थानमा प्रदर्शन चर्किँदै गएपछि भदौ २३ र २४ गतेको अवस्था तनावपूर्ण बनेको थियो। काठमाडौंमा प्रदर्शनका क्रममा प्रहरीको गोली लागेर १९ जनाको मृत्यु भएको थियो। त्यसपछि आन्दोलन थप उग्र बन्दै गएको र दुई दिनको अवधिमा मृतकको संख्या ७६ पुगेको थियो।

आन्दोलनका क्रममा सार्वजनिक तथा सरकारी संरचनामा समेत तोडफोड र आगजनीका घटना भएका थिए। नयाँ बानेश्वरस्थित संसद् भवन परिसरसमेत आन्दोलनको केन्द्र बनेको थियो। आन्दोलनले तत्कालीन केपी शर्मा ओली नेतृत्वको सरकार ढालेको थियो। ओली सरकार ढलेपछि पूर्वप्रधानन्यायाधीश सुशीला कार्कीको नेतृत्वमा चुनावी सरकार गठन भएको थियो। उक्त सरकारले फागुन २१ गते प्रतिनिधिसभाको निर्वाचन सम्पन्न गरेको हो भने निर्वाचनपछि झण्डै दुईतिहाई बहुमत सहित बालेन्द्र शाह नेतृत्वको सरकार बनेको हो।