एन्फामाथि फिफाले लगायो प्रतिबन्ध, बालेन्द्र शाहमाथि अन्तर्राष्ट्रिय झट्का
काठमाडौं । लामो समयदेखि राष्ट्रिय खेलकूद परिषदको नाममा भइरहेको चर्को हस्तक्षेप बालेन्द्र शाहले रोक्न नसकेपछि अन्ततः अखिल नेपाल फुटबल संघ (एन्फा) विश्व फुटबल महासंघ (फिफा) को प्रतिबन्धमा परेको छ ।
फिफाले हिजो (नेपाल समय अनुसार आज विहान) अखिल नेपाल फुटबल संघ (एन्फा) लाई प्रतिबन्ध लगाउने निर्णय गरेको छ । जुन नेपालको फुटबल इतिहासकै सबैभन्दा कालोधब्बा सावित हुन पुगेको छ ।
फिफाले प्रजातान्त्रिक प्रक्रियाको लागि तत्काल निर्वाचन गर्न चेतावनी दिँदै आएको थियो भने राष्ट्रिय खेलकूद परिषदले एन्फालाई निर्वाचन गर्नबाट रोक्दै आएको थियो । यसअघिको सरकारको पालादेखि चल्दै आएको राखेप र एन्फा बीचको विवाद वर्तमान सरकारको नेतृत्व गरिरहेका रास्वपाका बरिष्ठ नेता बालेन्द्र शाहले समेत रोक्न सकेनन् ।
बिहिवार फिफाले एन्फामाथि प्रतिबन्ध लगाइरहँदा बालेन्द्र शाह भने राष्ट्रिय स्वतन्त्र पार्टीको निर्वाचन सकेर काठमाडौं आई चितवनको फोटो सामाजिक सञ्जालमा पोष्ट गर्न व्यस्त थिए । सोही समयमा फिफाले एन्फामाथि प्रतिबन्ध लगाउने सूचना आइरहेको थियो ।
यदि सरकारले चाहेको भए यो समस्या कम्तीमा ७ दिन वा १५ दिनभित्र समाधान गर्न सक्ने थिए । राखेपले निर्णय गरेर निर्वाचन सम्पन्न गर्न दिएको भए फिफाले प्रतिबन्ध लगाउने थिएन । फिफाले फुटबल टिमलाई तेस्रो पक्षले हस्तक्षेप गरेको स्वीकार गर्दैन । बालेन्द्र शाह आफै संरक्षक भएको र सस्मित पोखरेल शिक्षा मन्त्री भएकोले उनीहरु दुई जनाले चाहेको भए यो समस्या समयमा नै हल गर्न सक्दथे ।
फिफाले आफ्नो वेभसाईटमा राखेको स्टेटमेन्टमा एन्फाको सदस्य जुन २४ देखि लागू हुने गरी निलम्वन गरिएको र एन्फा अब आफ्नो सदस्य समेत नरहेको उल्लेख छ । साथै फिफाबाट पाउने सबै प्रकारको आर्थिक सहयोगहरु बन्द गरिएको उल्लेख छ ।
प्रतिबन्ध लगाएको अवधीमा एन्फाले कुनै पनि अन्तर्राष्ट्रिय प्रतिबन्ध खेल्न नपाउने समेत उल्लेख गरेकोछ । सरकारले एन्फाभित्र चरम राजनीति गर्दै आएको थियो । अहिलेको सरकारले पनि सोही कार्यलाई निरन्तरता दिँदा समस्या उत्पन्न भएको हो ।
