गाडी किन्नुअघि ‘नाडा अटो शो’मा बीमा बुझाउँदै शिखर इन्स्योरेन्स, लक्की ड्रमार्फत उपहारको अवसर

काठमाडौं । राजधानीमा जारी ‘नाडा अटो शो २०२६’ मा निर्जीवन बीमा कम्पनी शिखर इन्स्योरेन्सले आफ्नो उपस्थिति जनाउँदै सवारी बीमासम्बन्धी जानकारी तथा सेवा प्रदान गरिरहेको छ । आजदेखि सुरु भएको अटो शोमा विभिन्न ब्रान्डका कार, कमर्सियल भेहिकल तथा दुईपांग्रे सवारीसाधन प्रदर्शनमा राखिएका छन् । सवारीसाधन खरिद गर्न तथा नयाँ मोडल अवलोकन गर्न आउने उपभोक्तामाझ शिखर इन्स्योरेन्सले बीमाको आवश्यकता, प्रकार र दाबी प्रक्रियाबारे जानकारी दिइरहेको हो ।

अटो शोमा सवारीसाधन खरिद गर्ने तयारीमा रहेका ग्राहकका लागि बीमा पनि महत्वपूर्ण विषय भएकाले कम्पनीले आफ्नो स्टलमार्फत बीमासम्बन्धी जानकारीलाई प्राथमिकतामा राखेको जनाएको छ । विशेषगरी सरकारले अनिवार्य गरेको तेस्रो पक्ष मोटर बीमाका विषयमा कम्पनीले सर्वसाधारणलाई जानकारी दिइरहेको छ । सवारीसाधन खरिद गर्दा मूल्य, सुविधा, प्रविधि र डिजाइनमा मात्र ध्यान नदिई त्यससँग जोडिने बीमा सुरक्षाका विषयमा पनि जानकारी लिनुपर्ने सन्देश कम्पनीले दिइरहेको छ ।

सवारीसाधनको संख्या बढ्दै गएसँगै सडक दुर्घटनाको जोखिम पनि कायम रहेकाले मोटर बीमा सवारीधनीका लागि महत्वपूर्ण वित्तीय सुरक्षाको माध्यम बनेको छ । दुर्घटनाका कारण सवारीसाधनमा क्षति पुग्दा ठूलो आर्थिक भार पर्न सक्ने भएकाले सम्भावित जोखिमलाई व्यवस्थापन गर्न बीमा उपयोगी हुने कम्पनीको भनाइ छ । सवारी दुर्घटना भएपछि उत्पन्न हुने आर्थिक दायित्वलाई कम गर्न बीमाले महत्वपूर्ण भूमिका निर्वाह गर्ने भएकाले सवारीसाधन धनीले बीमालाई अतिरिक्त खर्चका रूपमा मात्र नभई जोखिम व्यवस्थापनको साधनका रूपमा बुझ्नुपर्नेमा कम्पनीले जोड दिएको छ ।

कम्पनीले अटो शो अवधिभर ग्राहकलाई आकर्षित गर्न लक्की ड्रको समेत आयोजना गरेको छ । कम्पनीको स्टलमा पुग्ने आगन्तुकले आफ्नो नाम दर्ता गरी कम्पनीले उपलब्ध गराएको कुपन लक्की ड्र बक्समा राख्न सक्ने व्यवस्था गरिएको छ । अटो शो अवधिभर प्रत्येक दिन लक्की ड्रमार्फत विजेता छनोट गर्ने कम्पनीले जनाएको छ ।

लक्की ड्रमा पहिलो हुने विजेताका लागि नगरकोटस्थित रेस्टुरेन्टमा खाने तथा बस्ने सुविधा उपलब्ध गराइनेछ भने दोस्रो विजेताले एक वर्षसम्म निःशुल्क स्वास्थ्य बीमा पाउने व्यवस्था गरिएको कम्पनीले जनाएको छ । यसबाहेक अन्य उपहारसमेत प्रदान गरिने कम्पनीको भनाइ छ । अटो शोमा आउने सर्वसाधारणलाई बीमासम्बन्धी जानकारी दिने र कम्पनीको स्टलमा सहभागिता बढाउने उद्देश्यले लक्की ड्र आयोजना गरिएको हो ।