सयपत्री हाइड्रोपावरको आइपीओ भर्ने अन्तिम दिनमा कतिले दिए आवेदन?
काठमाडौं । सयपत्री हाइड्रोपावरको आइपीओमा १ अर्ब ७२ करोड ४५ लाख ८ हजार रुपैयाँ बराबरले आवेदन दिएका छन् । सीडीएसका अनुसार आज अन्तिम दिन साँझ ५ः०८ बजेसम्ममा १५ लाख २३ हजार ७०३ जनाले १ करोड ७२ लाख ४५ हजार ८० कित्ताका लागि आवेदन दिएका छन् । यो सर्वसाधारको लागि बिक्री खुला गरिएको कित्तालाई आधार मान्दा २५.७१ गुणा बढी आवेदन हो ।
सयपत्रीले साउन १३ गतेदेखि आजसम्म आयोजना प्रभावित स्थानीयले नकिनेको १ लाख २१ हजार ६० कित्तासमेत थप गरी कुल ७ लाख २१ हजार ६० कित्ता सेयर निष्कासन गरेको हो । यसमध्ये ५ प्रतिशत अर्थात ३६ हजार ५३ कित्ता सेयर समूहिक लगानी कोष र २ प्रतिशत अर्थात १४ हजार ४२१ कित्ता सेयर कम्पनीका कर्मचारीहरुका लागि छुट्याइएको थियो । बाँकी ६ लाख ७० हजार ५८३ कित्ता सेयरमा सर्वसाधारणले आवेदन दिनसक्ने व्यवस्था रहेको थियो ।
सो आइपीओमा बिक्री प्रबन्धक एनआइबीएल एस क्यापिटल रहेको छ । रेटिङ एजेन्सी केयर रेटिङ नेपालले ‘केयरएनपी डबल बी आइएस’ रेटिङ दिएको छ । यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ ।
