ट्रेड टावरको आइपीओ कहिले हुँदैछ बाँडफाँड ?
काठमाडौं । ट्रेड टावर लिमिटेडले यही जेठ १४ गतेदेखि २० गतेसम्म निष्काशन खुला गरेको आईपीओ असार १ गते बाँडफाँट गर्ने भएको छ । उक्त कम्पनीको आईपीओ बिक्री प्रबन्धक लक्ष्मी सनराइज क्यापिटलको कार्यालयमा आइतबार बिहान बाँडफाँड गर्ने तयारी गरिएको हो ।
आईपीओका लागि २१ लाख ६९ हजार ८९१ जनाले २ करोड ५७ लाख ७९ हजार ७९० कित्ताको लागि आवेदन दिएका छन् । कम्पनीले आफ्नो जारी पूँजी ८१ करोड ५६ लाख ९ हजार ७०० को रुपियाँको ४८.६९६ प्रतिशतले हुन आउने ३९ लाख ७१ हजार ६९३ कित्ता आईपीओ निष्काशन गर्न अनुमति पाएको थियो ।
जसमध्येबाट पहिलो चरणमा प्रतिकित्ता १०० रुपियाँका दरले ३ लाख ९७ हजार १६९.३० कित्ता शेयर वैदेशिक रोजगारीमा गएका नेपालीहरूका लागि, १ लाख ९८ हजार ५८४.६५ कित्ता सामूहिक लगानी कोषलाई र ७९ हजार ४३३.८६ कित्ता कम्पनीका कर्मचारीमा बाँडफाँट गरिसकेको छ ।
यसरी बाँकी रहेको ३२ लाख ९६ हजार ५०५.१९ कित्ता शेयर सर्वसाधारणका लागि निष्काशन गर्न लागेको हो । उक्त शेयर ३ लाख २९ हजार ६ सय ५० जनाले १०–१० कित्ताका दरले पाउने छन् ।
