काठमाडौं उपत्यकाको लाइफलाइन ठप्प
काठमाडौं । काठमाडौं उपत्यकाको लाइफलाइन नै ठप्प भएको छ । काठमाडौंलाई देशका विभिन्न भागसँग जोड्ने प्रमुख राजमार्गहरू बाढी, पहिरो र पुल तथा सडक संरचनामा भएको क्षतिका कारण प्रभावित बनेपछि उपत्यकाको सडक सम्पर्क संकटमा परेको हो ।
काठमाडौंलाई पश्चिम नेपालसँग जोड्ने मुख्य मार्ग पृथ्वी राजमार्ग बन्द भएपछि उपत्यकाबाट बाहिरिने र भित्रिने यातायात प्रभावित भएको छ । रसुवातर्फबाट आएको बाढीले धादिङ, तनहुँ र चितवनसम्मको सडक तथा नदी आसपासका क्षेत्रमा समेत असर पुर्याउन सक्ने अनुमान गरिएको छ । बाढीले पृथ्वी राजमार्गमा सवारी आवागमनका लागि प्रयोग हुँदै आएका पुल तथा सडक संरचना बगाउन थालेपछि राजमार्गको यातायात सम्पर्कमा गम्भीर असर परेको हो ।
पृथ्वी राजमार्गमा जाने सवारीसाधनलाई काठमाडौं उपत्यकामै रोकिएको छ भने पश्चिम तथा बाहिरी जिल्लाबाट काठमाडौं प्रवेश गर्ने सवारीसाधनको आवागमनसमेत प्रभावित भएको छ । काठमाडौं–नौबिसे–मुग्लिन–पोखरा हुँदै पश्चिम नेपाल जोड्ने पृथ्वी राजमार्ग राजधानीको सबैभन्दा महत्वपूर्ण सडक सञ्जालमध्ये एक हो ।
पृथ्वी राजमार्ग मात्रै नभई काठमाडौंलाई बाहिरी जिल्लासँग जोड्ने अन्य प्रमुख सडकको अवस्था पनि सहज छैन । काठमाडौं–नागढुंगा–नौबिसे–भीमफेदी–हेटौंडा हुँदै तराई जोड्ने त्रिभुवन राजपथ पनि संकटका बेला काठमाडौंको महत्वपूर्ण वैकल्पिक मार्गका रूपमा प्रयोग हुँदै आएको छ ।
राजधानी प्रवेश गर्ने र राजधानीबाट बाहिरिने मुख्य सडकहरू नै प्रभावित भएपछि काठमाडौंको लाइफलाइन ठप्प भएको छ ।
