स्वास्थ्य र चिकित्सा शिक्षासम्बन्धी पुराना सहमति कार्यान्वयन गरिने
काठमाडौं । सरकारले स्वास्थ्य तथा चिकित्सा शिक्षा क्षेत्रका माग सम्बोधन गर्न विगतमा विभिन्न पक्षसँग भएका सहमति कार्यान्वयन गर्ने निर्णय गरेको छ। कार्यान्वयन हुन बाँकी सहमतिलाई सम्बन्धित निकायसँग समन्वय गरी समयमै पूरा गर्ने सरकारको तयारी छ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा बिहीबार बसेको बैठकले विगतमा भएका सहमतिको समीक्षा गर्दै तिनको प्रभावकारी कार्यान्वयनमा जोड दिने निर्णय गरेको हो।
बैठकमा स्वास्थ्य तथा खाद्य स्वच्छता मन्त्री, शिक्षा तथा खेलकुद मन्त्री र वालेन्द्र शाहका स्वास्थ्य सल्लाहकारलगायत सहभागी थिए। बैठकमा यसअघि भएका सहमतिमध्ये कार्यान्वयन भइसकेका विषयको समीक्षा गर्नुका साथै बाँकी रहेका विषयलाई कसरी समयमै टुङ्ग्याउने भन्नेबारे छलफल भएको थियो।
विभिन्न पक्षसँग विगतमा भएका सहमतिको नियमित समीक्षा गर्ने सरकारको योजनाअनुसार बैठक आयोजना गरिएको जनाइएको छ। सरकारले सहमति कार्यान्वयनमा समन्वय बढाएर स्वास्थ्य तथा चिकित्सा शिक्षा क्षेत्रका माग सम्बोधन गर्ने लक्ष्य राखेको छ।
