शहिदभूमी गाउँपालिकामा बीमा सम्बन्धी छलफल सम्पन्न
काठमाडौं । नेपाल बीमा प्राधिकरण कोशी प्रदेशको आयोजनमा धनकुटाको शहिदभूमी गाउँपालिकामा बीमा सम्बन्धी छलफल तथा अन्तरक्रिया कार्यक्रम सम्पन्न भएको छ। स्थानीय तहमा बीमाको बारेमा पहुँच, दाबी प्रक्रिया, अनुदानका व्यवस्था तथा वर्तमान चुनौतीहरू लगायतको बिषयमा छलफल तथा अन्तरक्रिया कार्यक्रम सम्पन्न गरिएको हो।
कार्यक्रममा नेपाल बीमा प्राधिकरण कोशी प्रदेश कार्यालयका सहायक निर्देशक सचिन राईले बीमाको विभिन्न विषयमा आफनो प्रस्तुतीकरण राखेका थिए। अन्तरक्रियामा सहभागीहरूले सरकारी भवनको बीमाको आधार र दर, अभिकर्तामार्फत हुने सम्भावित ठगी, पशु बीमामा औषधि वितरणका प्रदेशगत फरक व्यवस्था तथा तेस्रो पक्ष मोटर बीमाको दाबी भुक्तानी चरणबद्ध गर्न सकिने–नसकिने जस्ता प्रश्नहरू उठाएका थिए।
कार्यक्रमका प्रमुख अतिथि शहिदभूमी गाउँपालिकाका अध्यक्ष मनोज राईले कृषक तथा सर्वसाधारणसम्म बीमा सम्बन्धी जानकारी पुग्नुपर्ने आवश्यकता औंल्याउँदै बाली, पशु र भवनसमेत सबै संरचनाको बीमा सम्भव रहने जानकारी व्यापक रूपमा फैलाउनुपर्ने बताए। बीमा सुरक्षणको माध्यम भएकाले यसप्रकारका कार्यक्रम उपयोगी रहेको उनले बताए।
गाउँपालिका उपाध्यक्ष रत्नेश्वरी राईले बीमासम्बन्धी सचेतनामूलक कार्यक्रमले समुदायमा ठूलो प्रभाव पार्ने उल्लेख गर्दै मानिस मात्र नभई पशु, बाली र भौतिक संरचनाको बीमा गर्न सुझाव दिइन्। गाउँपालिकाका प्रमुख प्रशासकीय अधिकृत सूर्यबहादुर भण्डारीले बीमा प्रक्रिया तथा पहुँचबारे छोटो समयमा व्यापक जानकारी पाएको बताउँदै यसलाई स्थानीय तहमा पुनः प्रसारण गर्ने प्रतिबद्धता जनाए।
नेपाल बीमा प्राधिकरण कोशी प्रदेश प्रमुख प्रिती देवले सबै बीमा सेवा लाइसेन्स प्राप्त कम्पनी र अधिकृत व्यक्तिमार्फत मात्र ग्रहण गर्नुपर्नेमा जोड दिंदै दाबीका बेलामा घटनाको यथार्थ विवरण अनिवार्य रूपमा दिन अनुरोध गरिन्। बीमा सेवा सम्बन्धी उजुरी भएमा नेपाल बीमा प्राधिकरणमार्फत अनलाइन उजुरी दिन सकिने व्यवस्था रहेको बताइन्। उनले कृषिमा सरकारले ५० देखि ८० प्रतिशतसम्म अनुदान उपलब्ध गराउने जानकारी दिंदै सिफारिसमा शंका लागेमा प्राधिकरणसँग प्रत्यक्ष समन्वय गर्न सकिने बताइन्। निजीर्वन बीमामा क्षति मूल्याङ्कनमा केही समय लाग्ने भएकाले धैर्य राख्न पनि आग्रह गरिन्।
कार्यक्रममा शहिदभूमी गाउँपालिकाका कर्मचारी, बीमक, बीमा अभिकर्ता, स्थानिय बासिन्दाहरूको उपस्थिती रहेको थियो। यस कार्यक्रमको सञ्चालन मिलन पोखरेलले गरेका थिए।
