नागढुंगामा सडक भासियो, काठमाडौं आउने–जाने बाटो प्रभावित
काठमाडौं । काठमाडौं आउने मुख्य सडकखण्ड नागढुंगा पातले वनमा सडक भासिएपछि आवागमन प्रभावित भएको छ । सडकको पर्खाल पुरानो भएका कारण सडक भासिएको बताइएको छ ।
सडक भासिएपछि मुग्लिनतर्फ बाहिरिने सवारी साधनमध्ये पेट्रोलियम पदार्थ बोकेका सवारी र दुईपाङ्ग्रे सवारीबाहेक अन्य सवारी साधनका लागि नागढुंगा सुरुङमार्ग खुला गरिएको छ ।
हाल पेट्रोलियम पदार्थ बोकेका सवारी साधन र मोटरसाइकललाई भने सडक भासिएको सोही स्थानबाट एकतर्फी रूपमा आवतजावत गर्ने व्यवस्था मिलाइएको सडक विभागले जनाएको छ ।
सडक विभागका अनुसार सडक भासिएको स्थानमा प्राविधिक अध्ययन गरेपछि मात्रै मर्मतको काम अघि बढाइनेछ । प्राविधिक अध्ययन र आवश्यक मर्मतपछि सडकलाई पूर्ण रूपमा सञ्चालनमा ल्याउने विषयमा छलफल भइरहेको विभागले जनाएको छ ।
सडक भासिएपछि जोखिमलाई ध्यानमा राख्दै पेट्रोलियम पदार्थ बोकेका सवारी साधन र मोटरसाइकललाई सोही रुटबाट एकतर्फी आवतजावतको व्यवस्था गरिएको हो ।
