नेपाल माइक्रो इन्स्योरेन्सको रेटिङ पुनः पुष्टि, शाखा विस्तारसँगै बनायो अझ सबल वित्तीय आधार
काठमाडौँ । नेपाल माइक्रो इन्स्योरेन्स कम्पनी लिमिटेडको इश्यूअर रेटिङ केयर रेटिङ्स नेपाल लिमिटेडले पुनः पुष्टि गरेको छ । कम्पनीलाई दिइएको ‘केयर–एनपी डबल बी माइनस (इश्यूअर रेटिङ)’ यथावत् राखिएको हो । यो रेटिङ प्राप्त इश्यूअरहरुले नेपालको वित्तीय दायित्व समयमा पूरा गर्ने मामिलामा मध्यम स्तरको जोखिम बोकेको मानिन्छ ।
कम्पनीले सन् २०२३ को मे महिनाबाट कारोबार सुरु गरेको हो । छोटो अवधि भए पनि कम्पनीले आफ्नो व्यवसायलाई विस्तार गर्दै गएको छ । प्रारम्भिक वर्षमा सानो परिमाणमा सञ्चालन हुँदा प्रशासनिक खर्च बढी रहे पनि कम्पनीको लाभांश मुख्यतया लगानी आम्दानीले टेवा पुर्याएको छ । बीमा प्रिमियम संकलन गर्ने क्षमता क्रमशः वृद्धि हुँदै जाने अपेक्षा गरिएको छ ।
यो कम्पनीले स्थापित अन्य बीमा कम्पनीहरुसँग प्रतिस्पर्धा गर्नुपर्ने भए पनि दक्ष सञ्चालक समिति र व्यवस्थापन टोलीको अनुभवबाट बल पाएको छ । साथै, कम्पनीले नेपालभरिकै विभिन्न भूभागमा आफ्नो उपस्थिति विस्तार गर्दै आएको छ भने यसको सॉल्भेन्सी प्रोफाइल पर्याप्त रहेको देखिन्छ । कम्पनीले पुनर्बीमा व्यवस्थालाई सन्तोषजनक ढंगले अगाडि बढाएको छ र लगानी पुस्तिकाको गुणस्तर पनि राम्रो रहेको उल्लेख गरिएको छ ।
आगामी दिनमा कम्पनीले आफ्नो व्यवसायलाई अझ विस्तार गर्दै बीमा पॉलिसीका विभिन्न खण्डमा विविधता ल्याउने, लगानी पुस्तिकाको गुणस्तर कायम राख्ने र नियामकीय सॉल्भेन्सी अनुपात कायम राख्ने क्षमतामाथि रेटिङ संवेदनशील रहने बताइएको छ ।
इन्स्योरेन्सलाई संस्थागत र व्यक्तिगत लगानीकर्ताहरुले प्रवर्द्धन गरेका छन् । कम्पनीको सञ्चालक समितिमा सात सदस्य रहेका छन् जसको अध्यक्षता आशिष श्रेष्ठले गरेका छन् । व्यवस्थापनमा स्नातकोत्तर गरेका श्रेष्ठलाई अटोमोबाइल क्षेत्रमा डेढ दशकभन्दा बढीको प्रबन्धकीय अनुभव छ । कम्पनीको समग्र सञ्चालन प्रमुख कार्यकारी अधिकृत मृगेन्द्रनाथ रिमालले गरिरहेका छन् । रिमाललाई बैंकिङ, वित्त तथा सूक्ष्म ऋण क्षेत्रमा दुई दशकभन्दा बढीको अनुभव छ । उनीसँगै कम्पनीलाई विभिन्न जिम्मेवारी सम्हाल्ने दक्ष टोलीले सहयोग गरिरहेको छ ।
हाल कम्पनीले ६ प्रदेशमा आफ्नो सेवा विस्तार गरेको छ । सन् २०२५ को जुलाईसम्म कम्पनीले ११ शाखा (प्रधान कार्यालय र प्रदेश कार्यालयसहित), २ उपशाखा र १७ बीमा प्रतिनिधि मार्फत सेवा विस्तार गरेको छ । सूक्ष्म गैरजीवन बीमा कम्पनीहरु प्रायः सहकार्य मोडेलमार्फत काम गर्ने भएकाले कम्पनीले बैंक तथा वित्तीय संस्था, विद्यालय, अटोमोबाइल कम्पनी, स्वास्थ्य संस्था र सहकारी संस्था गरी १५ वटा संस्थासँग सम्झौता गरेको छ ।
कम्पनीले बजारअनुकूल उत्पादनलाई पुनः परिकल्पना गर्ने, सीमान्तकृत र न्यून आम्दानी भएका वर्गलाई लक्षित गर्ने तथा आगामी केही वर्षमा थप शाखा र उपशाखा विस्तार गर्ने योजना अघि बढाइरहेको छ । पर्याप्त शाखा विस्तारले कम्पनीलाई बजार प्रवर्द्धन, ब्रान्ड पहिचान र ग्राहकहरुसम्म सहज पहुँचमा महत्वपूर्ण सहयोग गरेको छ ।
यससँगै, कम्पनीले पुनर्बीमा व्यवस्थापनलाई पनि सुदृढ पारेको छ । नेपाल पुनर्बीमा कम्पनी लिमिटेड र हिमालयन रिइन्स्योरेन्स लिमिटेडसँग सम्झौता गरी कम्पनीले दाबी रकमको ४ प्रतिशत प्रत्यक्ष रूपमा दुवै पुनर्बीमा कम्पनीलाई हस्तान्तरण गर्ने व्यवस्था मिलाएको छ । साथै, हिमालयन रिइन्स्योरेन्स लिमिटेडसँग क्वोटा सेयर सम्झौता पनि गरिएको छ, जसअनुसार नेपालमा सञ्चालन हुने सबै वर्गका बीमा व्यवसायमा (मोटर पोर्टफोलियो र विशेष जोखिम बीमा बाहेक) प्रत्येक पॉलिसीमा कम्पनीले ७० प्रतिशत सम्म पुनर्बीमा व्यवस्था गर्नेछ ।
