ग्रामीण बीमाको दायरा विस्तार गर्दै प्रोटेक्टिभ माइक्रो इन्स्योरेन्स, इक्राबाट पुनः ‘डबल बी’ मान्यता

धनगढी । इक्रा नेपालले प्रोटेक्टिभ माइक्रो इन्स्योरेन्स लिमिटेडको जारीकर्ता रेटिङ इक्रा एनपी–आईआर ‘डबल बी’ पुनः कायम राखेको छ। यो रेटिङले कम्पनीको वित्तीय दायित्व समयमै चुक्ता गर्ने क्षमतामा मध्यम जोखिम रहेको जनाउँछ। इक्राले जारी गरेको प्रतिवेदन अनुसार प्रोटेक्टिभले छोटो अवधिमै सन्तोषजनक प्रगति गरेको देखिएको छ। कम्पनीको स्वामित्व संरचना सुदृढ रहेको र पुँजी पर्याप्त भएकाले आगामी वर्षहरूमा यसले अझ सन्तुलित वित्तीय स्थिति कायम राख्ने अपेक्षा गरिएको छ।

कम्पनीले निकट भविष्यमा २२ करोड रुपैयाँ बराबरको साधारण शेयर (आईपीओ) जारी गर्ने तयारी गरेको छ जसले यसको पूँजी आधारलाई अझ सुदृढ बनाउनेछ। हालको सानो सञ्चालन स्तरका बावजूद कम्पनीको सॉल्भेन्सी स्थिति सन्तोषजनक रहेको इक्रा नेपालको मूल्याङ्कन छ।

वित्तीय वर्ष २०८१/८२ मा कम्पनीको बीमा कारोबारमा उल्लेखनीय वृद्धि देखिएको छ। सो अवधिमा कुल बीमा लेखा (ग्रस प्रिमियम) करिब २.८ गुणा बढेको छ। यो वृद्धि कम्पनीले देशभर शाखा तथा सेवा बिन्दु विस्तार गरेको कारण सम्भव भएको हो। अघिल्लो वर्ष २४ शाखाबाट सेवा प्रदान गरिरहेको कम्पनीले हाल ३३ वटा सञ्जाल बिन्दुबाट देशका विभिन्न भूभागमा बीमा सेवा पुर्‍याइरहेको छ।

छोटो समयमै व्यापक विस्तार हासिल गरेको कम्पनीले ग्रामीण तथा सुदूर क्षेत्रमा पनि बीमाको पहुँच बढाउने दिशामा काम गरिरहेको छ। यसले देशभरका साना व्यवसायी, किसान र श्रमिक वर्गबीच बीमा सचेतना विस्तार गर्न सहयोग पुगेको छ।

हाल कम्पनीको बीमा पोर्टफोलियोमा सवारी साधन बीमाको हिस्सा प्रमुख रहेको छ । यद्यपि, कम्पनीले पूँजी पर्याप्त रहेको कारणले जोखिम नियन्त्रण गर्न सक्ने क्षमता देखाएको छ।

नियमक निकायद्वारा साना बीमा उत्पादनहरूमा न्यूनतम प्रिमियम दरमा दिइएको छुटले कम्पनीलाई बजारमा प्रतिस्पर्धात्मक लाभ लिन मद्दत पुर्‍याउने विश्वास गरिएको छ। यससँगै प्रोटेक्टिभले ग्राहकमैत्री सेवा, सजिलो दाबी प्रक्रिया र ग्रामीण क्षेत्रमा पहुँच विस्तारजस्ता कार्यक्रममार्फत आफ्नो विश्वसनीयता बढाउँदै लगेको छ।