सन नेपाल लाइफको नारायणी क्षेत्रस्थित तीन शाखा कार्यालय स्थान्तरण
काठमाडौं । सन नेपाल लाइफ इन्स्योरेन्स कम्पनी लिमिटेडले नारायणी क्षेत्र अन्तर्गत टाँडी शाखा (रत्ननगर टाँडी–२), भरतपुर शाखा (भरतपुर–३, शहिद चोक, नारायणघाट) र चनौली शाखा (भरतपुर–१८) गरी तीन शाखा स्थान्तरण गरेको छ।
सेवा, पहुँच विस्तार र ग्राहक अनुभव सुदृढ बनाउने रणनीति अन्तर्गत उक्त तीन शाखालाई नयाँ तथा आधुनिक संरचनायुक्त स्थानमा स्थानान्तरण गरी औपचारिक रूपमा सञ्चालनमा ल्याएको कम्पनीले जनाएको छ। नयाँ कार्यालय मार्फत कम्पनीले विद्यमान तथा नयाँ पोलिसी होल्डरलाई अझ छरितो, सहज र गुणस्तरीय सेवा उपलब्ध गराउने उद्देश्य राखेको छ।
स्थानान्तरण उद्घाटन समारोहमा कम्पनीका प्रमुख कार्यकारी अधिकृत (सीईओ) राज कुमार अर्याल, प्रमुख बजार अधिकृत गणेश चौलागाईं र प्रदेश प्रमुख ईश्वर बिकल सापकोटा तथा सम्बन्धित शाखा प्रबन्धक तथा कम्पनीका कर्मचारीहरूको उपस्थिति रहेको थियो।
कार्यक्रममा बोल्दै सीईओ अर्यालले सेवा सुविधालाई ग्राहकसम्म प्रभावकारी रूपमा पुर्याउन संरचनागत सुदृढीकरण अत्यावश्यक रहेको उल्लेख गर्दै शाखा स्थानान्तरण पहल ग्राहकमैत्री अभिमुखीकरणतर्फको महत्वपूर्ण कदम भएको बताए।
त्यसैगरी प्रमुख बजार अधिकृत गणेश चौलागाईंले नयाँ स्थानका शाखामा छिटो सेवा, सुलभ काउन्टर, डिजिटल अभिलेख प्रणाली तथा सहज ग्राहक मार्गदर्शन जस्ता संरचनात्मक सुधारले ग्राहक सन्तुष्टि बढाउने विश्वास व्यक्त गरे।
सन नेपाल लाइफ इन्स्योरेन्सले संस्थागत सेवा गुणस्तर, पारदर्शिता र ग्राहक हितलाई प्राथमिकतामा राख्दै देशभर सरोकारवालामैत्री सेवा विस्तारका कार्यक्रमलाई निरन्तरता दिंदै आएको छ। हाल सन नेपाल लाइफले देशभर १४८ शाखा तथा उप–शाखाबाट जीवन बीमा सम्बन्धी सेवा प्रदान गर्दै आइरहेको छ।
