बीमा प्राधिकरणमा उजुरीको चाप, एक महिनामै ३३३ उजुरी दर्ता
काठमाडौं । नेपाल बीमा प्राधिकरणमा चालु आर्थिक वर्ष २०८२/८३ को सुरुवाती महिनामै बीमा सम्बन्धी उजुरीको संख्या उल्लेख्य देखिएको छ। प्राधिकरणले सार्वजनिक गरेको आर्थिक वर्ष २०८२÷८३ को श्रावण मसान्तसम्मको तथ्यांकअनुसार यस अवधिमा कुल ३३३ वटा उजुरी दर्ता भएका छन्।
प्राधिकरणका अनुसार चालु आर्थिक वर्षमा दर्ता भएका उजुरीमध्ये केन्द्रीय कार्यालयमा २७२ वटा र प्रदेश कार्यालयमा ६१ वटा उजुरी दर्ता भएका छन्। यसले बीमासम्बन्धी समस्या तथा गुनासो लिएर सेवाग्राहीहरू प्राधिकरणसम्म पुग्ने क्रम जारी रहेको देखाउँछ।
तथ्यांकअनुसार श्रावण मसान्तसम्म दर्ता भएका उजुरीमध्ये १५ वटा उजुरी फैसला भएका छन्। त्यस्तै, ६ वटा उजुरी सहमतिमार्फत समाधान भएका छन्। फैसला र सहमतिसहित यस अवधिमा जम्मा २१ वटा उजुरी फछ्र्योट भएका छन्।
यसैगरी, अघिल्लो आर्थिक वर्षबाट जिम्मेवारी सरेर आएका ३९४ वटा उजुरी पनि चालु आर्थिक वर्षको सुरुवातमा बाँकी रहेका थिए। अघिल्लो वर्षबाट बाँकी रहेका उजुरी र चालु आर्थिक वर्षमा दर्ता भएका उजुरीलाई समेट्दा प्राधिकरणमा कुल ६०० वटा उजुरी कायम भएका थिए।
प्राधिकरणको तथ्यांकले श्रावण मसान्तसम्म ३७२ वटा उजुरी बाँकी रहेको देखाएको छ। ती उजुरीमध्ये केही फैसला तथा सहमतिमार्फत टुंग्याउने प्रक्रियामा रहेका छन् भने अन्य उजुरीहरू विचाराधीन अवस्थामा छन्।
बीमा सेवा लिँदा कम्पनी र बीमितबीच उत्पन्न हुने विभिन्न विषयमा सेवाग्राहीले प्राधिकरणमा उजुरी दर्ता गर्न सक्ने व्यवस्था छ। दाबी भुक्तानी, बीमा सम्झौता तथा अन्य बीमा सेवासँग सम्बन्धित गुनासोहरू समाधानका लागि प्राधिकरणले उजुरी व्यवस्थापन गर्दै आएको छ।
प्राधिकरणको तथ्यांकले चालु आर्थिक वर्षको पहिलो महिनामै ३३३ उजुरी दर्ता हुनु र २१ वटा फछ्र्योट हुनुले बीमा क्षेत्रसँग सम्बन्धित गुनासो व्यवस्थापन तथा समाधानको विषयलाई निरन्तर प्राथमिकतामा राख्नुपर्ने देखाएको छ। आगामी महिनामा बाँकी उजुरी फछ्र्योट गर्ने र नयाँ आउने उजुरीलाई समयमै सम्बोधन गर्ने चुनौती प्राधिकरणसामु रहनेछ।
