दशैंलाई हरियाली देखाउँदै बिदा भयो बजारः कारोबार समेत बढ्यो, बुलिस ट्रेन्डको आशा !

काठमाडौँ । दशैंअघि शेयर बजारमा लगातार सुधार देखिएपछि लगानीकर्तामा आशा पलाएको छ । दशैंअघिको अन्तिम कारोबार दिन बजारमा सकारात्मक संकेत देखिँदा लामो समयदेखि सुस्त रहेको शेयर बजारले गति लिने अपेक्षा गरिएको छ । पछिल्ला कारोबार दिनमा देखिएको वृद्धिले लगानीकर्ताको मनोबल बढाउनुका साथै दशैंपछि बजारले थप गति लिन सक्ने सम्भावनाबारे चर्चा सुरु भएको छ । यद्यपि, बजारमा देखिएको सुधारले निरन्तरता पाउँछ वा पाउँदैन भन्ने विषय भने आगामी कारोबारमा निर्भर रहनेछ ।

लामो समयदेखि अपेक्षित गति लिन नसकेको शेयर बजारमा सुधार ल्याउने उद्देश्यले नेपाल राष्ट्र बैंक र नेपाल धितोपत्र बोर्डले विभिन्न नीतिगत व्यवस्था परिमार्जन गरेका थिए । ती व्यवस्थाको प्रभाव तत्काल बजारमा देखिन नसके पनि पछिल्लो समय बजारमा सकारात्मक संकेत देखिन थालेका छन् । नीतिगत सुधारसँगै शेयर मूल्य तुलनात्मक रूपमा तल्लो स्तरमा रहनु र लगानीकर्ताको मनोविज्ञानमा क्रमिक सुधार आउनुले बजारप्रति चासो बढाएको छ । यसले दशैंपछि कारोबार रकम र खरिदबिक्री गतिविधिमा वृद्धि हुन सक्ने सम्भावनालाई बल दिएको छ ।

बजारमा सुधार देखिएसँगै केही जानकारहरूले शेयर खरिदका लागि सम्भावित अवसर खोज्न सकिने धारणा राखेका छन् । लामो समयदेखि घट्दो वा सुस्त अवस्थामा रहेको बजारमा मूल्य तुलनात्मक रूपमा आकर्षक देखिनु र नीतिगत सुधारको प्रक्रिया अघि बढ्नुले लगानीका अवसर सिर्जना गर्न सक्ने उनीहरूको आकलन छ । तर, बजार बढ्ने अपेक्षाकै आधारमा हतारमा लगानी गर्नु जोखिमपूर्ण हुन सक्छ । त्यसैले लगानीकर्ताले सम्बन्धित कम्पनीको वित्तीय अवस्था, आम्दानी, लाभांश क्षमता, शेयर मूल्य तथा आफ्नो जोखिम वहन गर्ने क्षमताको मूल्याङ्कन गरेर मात्रै लगानीसम्बन्धी निर्णय लिनु उपयुक्त हुन्छ ।

यद्यपि, शेयर बजारमा सुधारका संकेत देखिए पनि चुनौतीहरू पूर्ण रूपमा हटिसकेका छैनन् । ठूला लगानीकर्ताको लगानीको स्रोतबारे उठेका प्रश्न, बाढीपहिरोबाट भएको क्षति तथा जलविद्युत् आयोजनामा परेको असरले बजारमा दबाब सिर्जना गर्न सक्छन् । त्यसैगरी, शेयर बिक्री गर्नुअघि जानकारी गराउनुपर्ने व्यवस्थासम्बन्धी विषयले पनि लगानीकर्ताको चासो बढाएको छ । आगामी दिनमा नीतिगत स्थिरता कायम हुनु, खरिद माग बढ्नु र लगानीकर्ताको विश्वास बलियो बन्नु बजारको दिगो सुधारका लागि महत्त्वपूर्ण हुनेछ । दशैंअघिको वृद्धिले सकारात्मक आधार तयार गरे पनि बजारको वास्तविक दिशा भने दशैंपछिको कारोबार, लगानीकर्ताको सहभागिता र समग्र आर्थिक अवस्थाले निर्धारण गर्नेछ ।

नेपाल स्टक एक्सचेञ्ज .(नेप्से) ८.२३ अकंले बढेर २६३४.१७ बिन्दुमा कायम भएको हो । आज ३४८ कम्पनीको १ करोड ३३ लाख कित्ता शेयर किनबेच हुँदा ४ अर्ब ८७ करोड २ लाख रुपैयाँको कारोबार भएको हो ।

आज ५ उपसूचकमा सुधार देखिएको छ भने ८ उपसूचक राताम्य भएका छन् । आज वाणिज्य बैंक र विकास बैंकको शेयर उच्च अकंले बढेको हो ।

शुक्रबार १७४ कम्पनीको शेयर मूल्य बढेको छ भने ९१ कम्पनीको घटेको छ । १२ कम्पनीको शेयर मूल्य स्थिर रहेको हो ।