कालिञ्चोक दर्शन लिमिटेडको आइपीओ बाँडफाँड सम्पन्न, ८९ हजार बढीले पाए १० कित्ता शेयर
काठमाडौं । कालिञ्चोक दर्शन लिमिटेडको आइपीओ बाँडफाँड सम्पन्न भएको छ । कम्पनीको बिक्री प्रबन्धक नबिल इन्भेष्टमेन्ट बैकिङ्ग लिमिटेडको कार्यालय नारायणचौर, नक्सालमा बाँडफाँड भएको हो ।
कम्पनीको आईपीओमा माग भन्दा बढी आवेदन परेकोले धितोपत्र बाँडफाँड निर्देशिका अनुसार न्युनतम १० कित्ताको दरले शेयर वितरण गरिएको छ । त्यस अनुसार ८९ हजार ६४० जनाले मात्रै शेयर पाएका छन् ।
कम्पनीको आइपीओमा मागभन्दा १८.५२ गुणा बढी आवेदन परेको थियो । १४ लाख ३२ हजार ८८१ जनाले कुल १ करोड ६६ लाख ८ हजार कित्ताको लागि आवेदन दिएका थिए । जसमा ८९ हजार ६४० जनाले मात्र सेयर हात पारेका छन् भने बाँकी १३ लाख ४३ हजार २४१ जनाको भने हात खाली भएको छ । जस मध्ये ८ हजार २ सय ६ जनाको आवेदन रद्द भएको छ ।
कम्पनीले आफ्नो जारी पूँजी ६० करोड रुपैयाँको १८ प्रतिशतले हुन आउने १० करोड ८० लाख रुपैयाँ बराबरको १० लाख ८० हजार कित्ता शेयर सर्वसाधारणका लागि छुट्याएको थियो । सोमध्ये १० प्रतिशत अर्थात १ लाख ८ हजार कित्ता वैदेशिक रोजगारीमा रहेका नेपालीहरुका लागि निष्काशन गरिसकेको छ भने ५ प्रतिशत अर्थात ५४ हजार कित्ता सामूहिक लगानी कोषहरुमा बाँडफाँट गरिसकेको छ ।
त्यसैगरी, २ प्रतिशतले हुन आउने २१ हजार ६०० कित्ता कर्मचारीहरुका लागि छुट्याइ बाँकी रहेको ८ लाख ९६ हजार ४०० कित्ता सर्वसाधारणका लागि निष्काशन गरेको थियो ।
